Sekretária Ezekutiva Nasionál Timor-Leste ba UNESCO, Cedelizia Faria dos Santos. Imajen Mídia UNESCO

DILI, 4 setembru 2019 (TATOLI)—Comite Memória do Mundo introdúz serbisu ba Primeiru Ministru (PM), Taur Matan Ruak.

“Ami-nia hasoru malu ho Primeiru-Ministru introdúz kona-ba ami-nia Comite Memória do Mundo ne’ebé estabelese iha 2016. Ita hatene governu ne’e foun, entaun ami sente katak ami iha papél no iha devér mai fó introdusaun organizasaun ida ne’e ba Primeiru-Ministru,” Sekretária Ezekutiva  Interina Komisaun Timor-Leste  ba UNESCO, Cedelizia  Faria dos Santos, ba jornalista sira, hafoin hasoru malu ho Xefe Governu, iha Palásiu Governu, kuarta ne’e.

Serbisu hosi Comite do Memória ne’e, nia esplika, atu haree fila-fali dokumentu hanesan aúdiu, vídeu ne’ebé mak nasaun iha depois sei hetan aprovasaun hosi nível nasionál no organizasaun ida ne’e sei lori arkivu sira ne’e ba rejistu iha United Nations Educational, Scientific and Cultural Organization (UNESCO) internasionál hodi sai mós patrimóniu dokumentál internasionál.

Comite Memória ne’e kompostu hosi Sekretaria Estadu Arte no Kultura, Komisaun Nasionál Timor-Leste  ba UNESCO, Sentru Nasionál CHEGA, Arkivu Nasionál Muzeu Rezisténsia, Timor AID no mós Dioseze Dili.

Cedelizia fó ezemplu, Arkivu Nasionál sei lori ho Arkivu Istóriku, Muzeu Rezisténsia mós iha dokumentu rasik, CHEGA mós iha dokumentu aúdiu, vídeu no kasete sira. “Kada instituisaun iha nia objetu ketak atu ba rejist”, katak nia.

Purtantu, Primeiru-Ministru, Taur Matan Ruak, fó apoia maka’as ba organizasaun refere no husu tenke halo planu ida ne’ebé di’ak liu ho integradu, nune’e minimiza serbisu doubru hosi kada instituisaun ida ho instituisaun seluk.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here