Reprezentante autoridade suku neen hosi Quelicai dadalia ho jornalista hafoin hala'o enkontru ho Xefe Estadu Lú olo. Imajen: Cipriano colo

DILI, 4 setembru 2019 (TATOLI) – Autoridade lokál hosi suku neen iha Postu Administrativu Quelicai, Munisípiu Baucau, kuarta ne’e iha Palásiu Prezidente Nicolau Lobato, Bairru Pité, konvida Prezidente Repúblika (PR), Francisco Guterres Lú Olo, atu bele hala’o vizita ba sira-nia suku, nune’e bele haree direta populasaun nia kondisaun moris iha postu administrativu refere.

Suku neen ne’e mak hanesan Suku Laisorulai de Cima, Laisorulai de Baixo, Abu, Bualale, Lelalai no Maluru, ho total aldeia hamutuk 21.

Representante autoridade lokál hosi suku neen, Cipriano Cabral, hateten konvite nee hato’o ba Xefe Estadu tanba inisiativa hosi autoridade lokál hosi suku neen.

Tuir planu, autoridade lokál hakarak atu Xefe Estadu hala’o diálogu ho komunidade kona-ba prosesu dezenvolvimentu, diálogu ho veteranu sira no vizita fatin istóriku sira iha foho matebian nia okos.

Nia hatutan, kona-ba konvite ne’e, Prezidente Repúblika konsidera pozitivu tébes no ekipa ne’e sei fila hikas ba baze hodi trasa hikas planu, ne’ebé iha fulan oin sei aprezenta hikas atu nunee Prezidente Repúblika bele foti desizaun.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here