Eis Prezidente Autoridade RAEOA, Marí Alkatiri. Imajen António Gonçalves

DILI, 04 setembru 2019 (TATOLI) – Sekretáriu Jerál Partidu FRETILIN (Frente Revolucionário de Timor-Leste Independente), Marí Alkatiri konsidera katak prosesu auto-determinasaun ne’e nu’udar sistema ida permanente, ne’ebé komunidade minoria mós tenke hetan rekoñesimentu iha prosesu konstrusaun estadu nia laran.

“Ha’u hanoin sentidu husi direitu auto-determinasaun ne’e nu’udar asaun ida atu halo entendimentu ba independénsia tanba timoroan sira uluk hamriik kumu liman hodi luta hasoru kolonializmu ne’e duni ikus mai mosu referendum ne’ebé hanaran Konsulta Populár,” hateten Sekretáriu Jerál, Marí Alkatiri ba jornalista sira hafoin sai oradór iha UNTL, ohin.

“Maibé auto-determinasaun ne’e konsidera nu’udar sistema ida permanente. Ne’ebé, tanba ohin loron barak mak ko’alia ona kona-ba inkluzaun,” nia reforsa.

Eis-primeiru-Ministru ne’e esplika sistema auto-determinasaun kuandu kabe ba inkluzaun signifika povu ka komunidade minoria tenke hetan rekoñesimentu tenke hetan direitu no tratamentu hanesan.

Auto determinasaun ne’e nu’udar prosesu ida ne’ebé tenke loke duni dalan ba komunidade maioridade atu determina la’ós atu husi independénsia maibé oinsá bele hetan rekoñesimentu husi maioria hodi bele partisipa iha prosesu tomak rai ida ne’e nian.

“Ne’e duni atu prienxe demokrasia ida ne’e presiza lideransa ida di’ak duni atu nune’e uainhira nia kaer ukun mós bele serve duni povu iha rai ida ne’e,” hateten Sekretáriu Jerál Marí Alkatiri.

Notísia relevante:Konsulta Populár, Momentu Importante Ba Povu Timór Atu Deside

 Jornalista : Tomé  Amado

Editór       : Rafy Belo

HAKEREK NO HATÁN

Please enter your comment!
Please enter your name here