Koordenadór Rezidente Organizasaun Nasaun Unida, Roy Trivedy, hala’o enkontru ho Prezidente Repúblika, Francisco Guterres Lú Olo, ohin. Imajen Mídia PR

DILI, 3 Setembru 2019 (TATOLI)—Koordenadór Rezidente Organizasaun Nasaun Unida, Roy Trivedy, hala’o enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, tersa ne’e.

Hafoin enkontru, Roy Trivedy hateten katak Sesaun Anuál Asembleia Jerál Nasaun Unida importante ba nasaun.

Nia dehan, iha Asembleia Jerál Organizasaun Nasaun Unida (ONU) tinan ne’e, sei ko’alia kona-ba mudansa klimátika, finanseiru ba dezenvolvimentu, saúde, Voluntary National Report no Objetivu Dezenvolvimentu Sustentável.

Koordenadór ne’e mós fó hanoin katak Timor-Leste hatudu tiha ona progresu barak iha área refere ne’ebé presiza fahe ninia esperiénsia ba nasaun seluk atu apriende.

Aleinde ne’e, nia rekoñese katak foin lalais Timor-Leste Komemora Aniversáriu Tinan-20 Referendu ne’ebé hatudu progresu barak iha serbisu saúde ninian, Voluntary National Report ne’ebé forte tebes no Objetivu Dezenvolvimentu Sustentável (ODS) ne’ebé sai ezemplu ba nasaun seluk.

Kona-ba asuntu ne’e, Roy Trivedy hateten katak Prezidente Repúblika prontu atu partisipa iha Asembleia Jerál ONU ba dala-74 iha Nova Iorke, iha ne’ebé Xefe Estadu hosi nasaun 164 sei partisipa.

Maski nune’e, Viajen Prezidente Repúblika ba Nova Iorke presiza hetan aprovasaun hosi Parlamentu Nasionál no Prezidente Repúblika rasik hato’o tiha ona pedidu viajen ba Nova Iorke ninian ba Parlamentu Nasionál atu aprova. Tuir planu, Asembleia Jerál ONU ba dala-74 sei realiza iha loron 23 to’o 30 setembru tinan ne’e.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here