DILI, 03 agostu 2019 (TATOLI)-Programa Dezenvolvimentu husi Nasaun Unida (UNDP-sigla Inglés) iha kompromisu atu kontinua apoiu Governu Timor-Leste liuhusi Ministériu Justisa (MJ) hodi fó kapasitasaun rekursu umanu ba Juiz, Prokuradór no Defensór Públiku hodi dezenvolve di’ak liután setór justisa Timor-Leste nian.
Notísia Relevante : MJ Sei Oferese Bolsu Estudu ba Timoroan Na’in 20
Reprezentativu Rezidente UNDP foun ba Timor-Leste, Munkhuya Altangerel, hato’o UNDP nia prontidaun ne’e durante audiénsia ho Ministru Justisa, Manuel Cárceres da Costa, ohin, iha Ministériu Justisa, Caicoli, Dili.
Manuel Caceres da Costa, esplika, UNDP sei fó apoiu kurríkulu ba Sentru Formasaun Jurídiku Judisiáriu ne’ebé liga ho matéria hanesan violasaun bazeia ba jéneru, matéria psikolojia ba Prokuradór, Juis no Defensór Públiku iha tinan 2020.
Ministru Justisa ne’e dehan, iha polítika governasaun daualuk konsentra mós ba formasaun no kapasitasaun ba rekursu umanu hodi dezenvolve liután setór justisa hodi fó justisa loloos ba povu.
“Governu labele dependente ba sira nia ajuda, iha posibilidade atu apoiu ita prontu simu, mais programa oitavu Governu nian ne’ebé trasa ona kontinua la’o,” afirma Ministru Justisa Manuel Cárceres da Costa.
Durante ne’e, UNDP Timor-Leste apoiu ona finansiamentu ba Ministériu Justisa hodi implementa iha área teknolojia informátika (IT) no mós apoiu sira seluk tan.
Jornalista : Nelson de Sousa
Editór : Francisco Simões
