Ministru Reforma Lejizlativa no Asuntu Parlamentár no Ministru Koordenadór Asuntu Ekonómiku (MKAE) interinu, Fidelis Manuel Leite Magalhães.

DILI, 03 setembru 2019 (TATOLI)-Ministru Reforma Lejizlativa no Asuntu Parlamentár no Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, husu instituisaun hotu ne’ebé hamahan-aan iha MKAE atu kontinua hadi’a aan ho hasa’e prestasaun servisu ne’ebé ho kualidade ba atende sidadaun sira.

“Ita tenke hadi’a ita-nia aan hodi atende populasaun sira ho servisu ida kualidade, tanba sidadaun barak sei preokupa ita-nia atendimentu”, Ministru Fidelis hatete iha ámbitu enkontru ho instituisaun sira ne’ebé toma asuntu ekonomia, iha edifísiu TradeInvest, Kolmera, ohin.

Ministru Reforma Lejizlativa no Asuntu Parlamentár no Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, halo soru-mutu ho instituisaun sira ne’ebé hamahan-aan iha MKAE hodi diskute planu prioridade sira atu orsamenta ba OJE 2020.

MKAE internu ne’e adianta, iha enkontru ne’e diskute prioridade saida de’it mak kada ministériu no sekretáriu estadu sira iha hodi bele orsamenta iha Orsamentu Jerál Estadu (OJE) 2020.

“Ita-nia área tenke sai área prioridade iha governasaun ida ne’e hodi dezenvolve setór ekonomia iha área indústria no turizmu”, katak.

Nia salienta enkontru ne’e mós diskute planu no programa sira ne’ebé kada ministériu halo ona iha tinan ne’e no programa prioridade hirak ne’ebé atu implementa iha 2020.

“Ami diskute prioridade lubuk ida hanesan kontinua prioritiza asuntu turizmu, kooperativa no dezempregu inklui ambientál ne’ebé mak ita sei foku no orsamenta iha 2020″, ministru relata.

Tanba ne’e, nia husu ba governante no kargu xefia sira atu kontinua servisu hamutuk hodi fornese prestasaun servisu ba públiku liuliu sidadaun sira.

“Ha’u husu ita hotu kontinua koordena malu no kria komunikasaun ida di’ak hodi hasa’e prestasaun servisu di’ak ba públiku”, sujere.

Kona-ba OJE 2020, MKAE interinu ne’e dehan seidauk iha konkluzaun atu prevee tanba sei diskute hela programa prioridade sira. “Ita presiza diskute prioridade sira mak ita orsamenta iha orsamentu Jerál Estadu 2020”.

Partisipa iha enkontru hodi define prioridade ne’e mak Sekretáriu Estadu Formasaun no Profisionál no Empregu, Julião da Silva, Sekretáriu Estadu Kooperativa, Arsénio Pereira, Sekretáriu Estadu Ambiente, Demétrio do Amaral de Carvalho, inklui diretór no kargu xefia sira.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here