Ministru Justisa, Manuel Cárceres da Costa, Imajen/Egas Cristovão

DILI, 03 setembru 2019 (TATOLI)-Konsellu Koordenasaun Justisa (KKJ) ne’ebé lidera husi Ministériu Justisa sei halo konsultasaun públiku kona-ba ezbosu lei organizasaun judisiáriu molok haruka ba Konsellu Ministru hodi hetan apresiasaun.

Notísia Relevante : Sei Elimina Artigu Balun iha Proposta Lei Organizasaun Judisiáriu

Ministru Justisa, Manuel Cárceres da Costa, hatete, konsultasaun públiku ne’e,  hodi hetan opiniaun konstrutivu  husi jurista Timoroan ne’ebé iha kapasidade iha área  lei atu hadi’a di’ak liután ezbosu governu ne’e.

“Ita husu uluk lai matenek na’in Jurista Timoroan sira hodi fó mós hanoin hodi kontribui ba ezbosu lei ne’e,” hateten  Ministru Manuel Cárceres da Costa, ohin, ba Ajénsia TATOLI iha ninia servisu fatin, Ministériu Justisa,  Caicoli, Dili.

Notísia Relevante : Proposta Lei Organizasaun Judisiáriu iha Artigu 112

Ministru Manuel Cárceres da Costa esplika, depois halo konsultasaun ho públiku iha tempu badak, Ministériu Justisa sei lori ezbosu ne’e ba aprezenta iha  reuniaun Konsellu Ministru hodi hetan apresiasaun no kontinua lori ba Parlamentu Nasionál hodi diskute no aprova.

Bainhira Parlamentu Nasionál aprova ona ezbosu lei organizasaun judisiáriu ne’e, tuir Manuel Cárceres,  sei sai mata dalan ba Governu hodi dezenvolve setór justisa.

Notísia Relevante : Tempu Besik, MJ Finaliza Ezbosu Lei Organizasaun Judisiáriu

“Agora ita la’o  hela ho  rezolusaun UNTAET nian ne’ebé la adekuadu ho ita nia realidade,” hateten Manuel Cárceres.

Manuel Cárceres hateten, Lei ne’e importante atu organiza setór judisiáriu sira hanesan Tribunál, Ministériu Públiku atu funsiona liuliu atu haree Timor-Leste  presiza atu harii Tribunál Kontas, Tribunál Superiór Administrativu no seluk tan.

Nia hatutan,  Governu presiza hadi’a mós kódigu penál, kódigu sivíl, kódigu prosesu penál, kódigu prosesu sivíl, Lei Terras no Propriedade, Lei Previstu Previál, rejistu sivíl hodi apár malu ho lei organizasaun judisiáriu.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here