Prokuradór Jerál Repúblika, José da Costa Ximenes ho nia adjuntu hala’o enkontru ho Prezidente Repúblika, Francisco Guterres Lú Olo, ohin. Imajen Mídia PR

DILI, 3 setembru 2019 (TATOLI)—Ohin, Prokuradór Jerál Repúblika, José da Costa Ximenes, realiza  enkontru mensál ho Prezidente Repúblika (PR),  Francisco Guterres Lú Olo,  iha Palásiu Prezidente Nicolau Lobato, Bairru Pité, Dili.

Hafoin enkontru, Prokuradór Jerál Repúblika, José da Costa Ximenes, hateten durante enkontru informa ba Xefe Estadu kona-ba atividade Ministériu Públiku durante féria judisiáriu majistradu no ofisiál justisa ne’ebé kontinua garante serbisu ba primeiru interrogatóriu no julgamentu sumáriu sira.

Nia dehan, durante féria judisiáriu, Prokuradoria Jerál Repúblika (PJR) serbisu hamutuk ho parseiru dezenvolvimentu hodi haruka nia membru sira tuir formasaun iha rai-li’ur, hanesan mós atividade ida atu priénxe féria Judisiária. Atividade sira mak hanesan, Adjuntu Prokuradór  partisipa konferénsia meiu ambiente no tráfiku droga no tuir formasaun iha Austrália kona-ba brankeamentu kapitál no terorizmu.

Iha nível majistradu, PJR dezigna nia majistradu na’in-tolu no juiz na’in-hitu halo estudu tour iha Estadu Unidu Amérika.

Aleinde ne’e, iha majistradu ida ba tuir formasaun iha Bangkok kona-ba tráfiku ema. Hosi 9-13 setembru, majistradu sira sei partisipa mós formasaun kona-ba korrupsaun iha setór públiku.

José salienta mós katak Prokuradória Jerál Repúblika asina ona nota intendimentu ho Komisaun Funsaun Públika atu halo formasaun ba investigadór públiku iha ámbitu kriminál no disiplina ninian.

Hosi parte seluk, Konsellu Superior Ministériu Públiku nomea tiha ona ema na’in-7 ba sekretáriu iha serbisu sentrál, espesializada no iha munisípiu sira ne’ebé sei toma pose iha 6 setembru.

Nia esplika, kona-ba nomeasaun ba ema na’in-hitu ne’e, na’in neen hanesan permanente no ida hanesan interinu.

Iha implementasaun serbisu, ida sei sai hanesan sekeretáriu ba serbisu espesializada no sekeretáriu ba Konsellu Superiór Ministériu Públiku, ida ba Sekretáriu Inspesaun, ida ba Gabinete Kombate Korrupsaun no Krime Organizada, na’in haat seluk ba Sekretáriu Distritál sira. “Uluk nomeasaun interinu de’it, maibé agora ba permanente hotu”, Ximenes haklaken.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here