DILI, 03 setembru 2019 (TATOLI)-Reprezentante Organizasaun Mundiál Saúde (OMS) iha Timor Leste, Rajesh Pandav, hateten pesóal saúde sira mak fundasaun baze ba sistema saúde sustentavel sira ho fundamentu progresu ba kobertura saúde universál no objetivu dezenvolvimentu sustentavel

Tuir indikadór rekursu umanu nian, pasu tuir  mai mak atu bele sustenta nafatin hodi  aumenta rekursu umanu hodi haforsa kompeténsia no kapasidade estabelese mekanizmu reguladór ida hodi garante kualidade.

“Timor-Leste halo ona investimentu boot ba dezenvolvimentu pesoál saúde sira ita bele hare rezultadu ida ne’e iha grupu profisionál saúde ne’ebé aumenta boot iha rai laran, hanesan hatudu iha melloramentu signifikativu. Tuir indikador rekursu umanu nian pasu tuir  mai mak atu bele sustenta nafatin hodi aumenta rekursu umanu haforsa kompeténsia no kapasidade estabelese mekanizmu reguladór ida hodi garante kualidade no mós estabelese sistema forte ba informasaun no evidénsia ba matadalan polítika no asaun jestaun nian,” dehan reprezentante OMS iha Timor-Leste, Rajesh Pandav, iha nia diskursu iha workshop nasionál, iha Timor Plaza, Dili, tersa (03/09/2019).

Le kleur tan, nia hatutan, liuhusi workshop ida ne’e Governu no OMS bele finaliza no implementa estratéjia nasionál rekursu umanu ba saúde tinan 2020-2024 ne’ebé sei guia ita hodi kapasita pesoál saúde sira ne’ebé kompotente no dedikadu iha Timor-Leste.

Reprezentante OMS ne’e hateten, workshop konsultativu ida ne’e mós fornese oportunidade atu identifika no implementa solusaun apropriadu ba pesoál saúde sira-nia dezafiu iha setór saúde nia laran ka intersetorál ho edukasaun finansa no parseiru seluk.

“Ida ne’e sei fó dalan ba parte interesada xave sira hodi deskuti kona-ba dezafiu boot no abordazen inovativu ida. Ida ne’e mós sei ajuda finaliza estratéjia nasionál rekursu umanu ba saúde hodi garante katak ita iha pesoál saúde sira mak bele fornese tratamentu saúde ne’ebé sidadaun sira presiza agora no iha futuru,” nia hateten.

Atu lori serbisu importante ida ne’e la’o ba oin, nia apela, atu konsidera realidade no dezafiu atuál no kria solusaun prátika no apropriadu, tenke aselera momentu ba kobertura saúde universál no objetivu dezenvolvimentu sustentavel.

Tuir nia, Timor-Leste mós foti ona pasu importante ida hodi melloria kualidade serbisu nian. Signifika katak tratamentu saúde tenke efetivu, seguru no sentradu ba komunidade ida ne’e. Klaru katak ita labele atinji sein iha asaun ba rekursu umanu saúde. Atu garante kualidade, ita presiza iha ema ne’ebé loos no kompotente iha fatin ne’ebé loos, hetan apoiu husi sistema ne’ebé enkoraja sira atu halo serbisu ne’e  ho di’ak.

Estratéjia rekursu umanu ba saúde, nia haktuir, sei komplementa estratéjia nasionál ba kualidade ne’ebé mak agora daudaun dezenvolve hela hodi sai hanesan fundamentu pesoál saúde sira-nia papel krítiku ba tratamentu saúde ho kualidade.

“Organizasaun Mundiál Saúde, sei estende tan rekursu no presiza tékniku hodi fó apoiu ba Ministériu Saúde  atu finaliza no implementa estratéjia nasionál rekursu umanu ba saúde. Ami mós iha ona espesialista rekursu umanu ba saúde ne’ebé mak sei serbisu besik liu ho ekipa Ministériu Saúde nian atu haforsa profisionais saúde sira iha Timor-Leste,” nia dehan.

Notísia relevante:Governu Ho OMS Finaliza Esbosu Planu Estratéjiku Nasionál Rekursu Umanu

Jornalista: Felicidade Ximenes

Editór .      : Rafy Belo

HAKEREK NO HATÁN

Please enter your comment!
Please enter your name here