Prokuradór Jerál Repúblika (PJR), José da Costa Ximenes. Imajen/Egas Cristovão

DILI, 03 setembru 2019 (TATOLI) – Relasiona ho rekerimentu Bankada FRETILIN ba Ministériu Públiku (MP), atu halo investigasaun bazeia ba relatóriu Komisaun Inkéritu Parlamentár (KIP) ba projetu 143, dadaun ne’e iha ona prosesu judisiáriu.

“Ha’u simu ona, diriji ba Gabinete Prokuradór Jerál. Agora dadauk prosesu judiriáriu no ami hatun ona ba Gabinete Sentrál Kombate Korrupsaun para hahú investigasaun”, tenik Prokuradór Jeral Repúblika, José da Costa Ximenes ba jornalista sira, hafoin enkontru ho Prezidente Repúblika, Francisco Guterres Lú Olo, iha Palásiu Prezidensiál, tersa ne’e.

Bankada FRETILIN hatama rekerimentu iha MP iha loron 28 agostu, no iha karta bankada opozisaun ne’e ko’alia kona-ba faktu sira ne’ebé KIP deteta, hanesan aktu violasaun ba Lei Aprovizionamentu.

Entretantu, KIP konklui ona servisu iha loron 22 marsu, ho dokumentu hamutuk 60 pájina, kompostu husi konkluzaun 34 no rekomendasaun 31.

Maski nune’e, relatóriu komisaun ne’e la konsege debate iha plenária tanba Bankada Governu no Bankada Opozisaun la hetan konsensu hodi aprova relatóriu iha komisaun.

Estabelesimentu KIP bazeia ba pedidu Bankada Opozisaun FRETILIN, ne’ebé submete rekerimentu inkéritu parlamentár ba projetu hamutuk 143 ho montante millaun $345, ne’ebé Konsellu Administrasaun Fundu Infraestrutura (KAFI) aprova iha loron 19 Jullu 2017.

Husi parte Governu liuhosi Gabinete Primeiru-Ministru, estabelese ona ekipa avaliasaun no levantamentu ba projetu 143, molok halo pagamentu.

Ekipa ne’e envolve mós Ministériu Obra Públika (MOP), Ministériu Planeamentu Investimentu no Estratéjiku (MPIE), Ajénsia Dezenvolvimentu Nasionál (ADN), no KAFI.

Antes ne’e, Ministru Obra Públika, Salvador Eugénio Soares dos Reis Pires, informa entre projetu 143 ne’e, projetu 45 mak laiha kontratu. Maibé iha dezembru 2018, hosi projetu 45 aprova ona projetu 15, tanba projetu hirak ne’e nia konsideradu ho karákter urjénsia.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here