DILI, 03 agostu 2019 (TATOLI) – Konstrusaun Edifisiu FEST (Fakuldade EnjenáriaE Siénsia no Teknolojia), UNTL ( Universidade Nasionál Timor Lorosa’e) Hera, ne’ebé konstrui liuhusi kooperasaun entre Governu Japaun no Timor-Leste atinje ona 90%.

Tuir Ezekutivu Departamentu Konstrusaun Edifísiu FEST-UNTL Hiroyuki ISOGAI, objetivu vizita ne’e atu observa progressu husi konstrusaun refere.

“Konstrusaun ne’e hahú hala’o iha fulan fevereiru tinan 2018 ho osan montante 20 millaun, konstrusaun edifísiu ne’e nia Konsultór no Kontratór sira mai husi Japaun,” informa Hiroyuki ISOGAI ba jornalista sira depois halo observasaun ba Edifísiu FEST-UNTL iha Hera, tersa (03/09/2019).

Tuir observasaun ne’ebé, iha edifísiu ne’e iha sala hamutuk 90 inklui mós sala ba dosente sira, laboratóriu no auditóriu.

Tuir esplikasaun ne’ebé jornalista sira hetan husi ISOGAI Hiroyuki katak sala aula sira ne’e ho medida ne’ebé la hanesan; iha medida bo’ot no mós medida ki’ik.

“Medida boot bele akumula estudante hamutuk 40 no sala ida ki’ik 15, nune’e mós sala ba dosente sira totál 25. Nia prosesu atinje ona 90% husi sala hotu,” haktuir enjineiru japonés ne’e.

Nia haktuir tan, husi totál sala 90 ne’e sala lima maka sei uza hanesan sala ba prátika nian ka laboratóriu, ne’ebé laboratóriu ba departamentu IT (Informasaun Teknolojia) rua, ba Jeologia ida no rua seluk jerál, iha mós biblioteka ho medida ne’ebé luan no sala auditóriu ne’ebé maka bele akumula estudante ho totál 400 maibé sala auditóriu seiduk ramata no atinje ona pursentu 90.

Konstrusaun ne’e harii tau mós importansia ba estudante sira ne’ebé maka maka ho kondisaun defisiente nune’e iha edifísiu refere sira mós halo eskada “rampa” atu nune’e estudante sira ne’ebé defisiente ka uza kadera roda bele mós asesu ba sala sira iha leten liuhusi eskada rampa no haris fatin.

Tuir prosesu ne’ebé maka iha, instalasaun materiál ba edifísiu sei halo uainhira ramata ona serbisu todan balun no bee mós neebe agora daudaun utiliza no sei utiliza iha futuru nee mai husi bee mosu (sumur) depois de halo filtrusaun.

Entretantu, Konstrusaun Edifísiu FEST-UNTL, Hera ne’ebé konstrui iha fevereiru 2018, tuir planu sei ramata no sei entrega ba UNTL iha fulan outubru tinan 2019.

Jornalista: Nelia Borges

Editór.       : Rafy Belo

HAKEREK NO HATÁN

Please enter your comment!
Please enter your name here