Vise Koordenadór Jerál Komisaun Organizadora Loron Konsulta Populár dala-20 no Misaun INTERFET, Juvencio de Jesus Martins. Imajen/Tatoli

DILI, 03 setembru 2019 (TATOLI) – Vise Koordenadór Jerál Komisaun Organizadora Konsulta Populár dala-20 no Misaun INTERFET, Juvencio de Jesus Martins,  informa loron 4 setembru hanesan loron ida ne’ebé importante ba povu Timor-Leste. Tanba ne’e, sei selebra ho Marsa ba Pás hosi Hotel Timor ba Sentru Konvensaun Dili (CCD- sigla Portugés), eis Merkadu Lama, Caicoli, Dili.

“Aban, Xefe UNAMET iha altura ne’ebá, Ian Martin, anúnsia rezultadu referendu 30 Agostu 1999 ne’e iha Hotel Timor. Hafoin ne’e, ita halo kedas Marsa ba Pás hosi ne’e (Hotel Timor) ba to’o CCD. Iha ne’ebá, sei organiza banda múzika hosi ita-nia artista timoroan sira balun sei halo animasaun no partisipa mós hosi Primeiru-Ministru, Taur Matan Ruak,” dehan Juvencio liuhosi konferénsia ba imprensa ne’ebé hala’o iha Paláçio do Governo, ohin.

Nia esplika, Marsa ba Pás ne’e hala’o hodi hanoin hikas maluk timoroan hirak ne’ebé lakon sira-nia vida hafoin rona rezultadu referendu.

Objetivu seluk, nia hatutan, atu halibur ema hotu hamutuk hodi hato’o kompromisu hametin pás no estabilidade hodi dezenvolve nasaun ne’e ba oin.

Juvencio haktuir, 4 setembru 1999 dadersan ema hotu fuan tuku-tuku hodi hein rezultadu hosi votasaun 30 agostu.

“Iha momentu ne’ebá, ema hotu laran taridu hodi hein rezultadu referendu ne’ebé anúnsia hosi Ian Martin iha ne’ebé parte pro-independénsia mak manán, entaun aban ne’e Komisaun Organizadora iha planu hala’o selebrasaun ne’e iha Hotel Timor tanba iha 1999 Ian Martin anúnsia rezultadu referendu iha duni Hotel Timor ne’ebé antes ne’e naran Mahakota,” nia informa.

Tanba ne’e, Komisaun Organizadora konvida povu hotu iha territóriu tomak hamutuk hodi festeja loron importante ne’e iha ida-idak nia munisípiu, suku no aldeia.

“Ami mós konvida populasaun tomak iha Dili laran atu mai konsentra hamutuk iha Hotel Timor hodi ita festeja loron ne’e. Ami konvida ona eskola sekundáriu hamutuk rua-nulu resin haat ho sira-nia dram band ho mós ekipamentu seluk-tan hodi halo rame eventu aban ne’e,” nia subliña.

Entretantu, oráriu ba eventu ne’e hanesan tuku 8:00 dadér hotu-hotu konsentra iha Hotel Timor. Tuku 8:30, protokolu sei halo boas vinda ba Primeiru-Ministru, Taur Matan Ruak, eis Prezidente Repúblika, José Ramos Horta no Programa Nasaun Unida ba Dezenvolvimentu (UNDP-sigla inglés) mós sei aprezenta video badak ida kona-ba 4 setembru liliu rona fali rekriasaun anúnsiu rezultadu 30 Agostu hosi Ian Martin iha Salaun Hotel Timor.

Eventu refere sei fó sai liuhosi transmisaun direta hosi Rádio TelevisãoTimor-Leste, Empresa Pública (RTTL, EP).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here