Komandante ein-Xefe FALINTIL, Kay Rala Xanana Gusmão. Imajen/Antonio Goncalves

DILI, 2 setembru 2019 (TATOLI)-Xefe Suku Deudet, Cipriano Belo, hato’o apresiasaun no agradesimentu ba Komandante ein-Xefe FALINTIL, Kay Rala Xanana Gusmão, tanba  inisia no organiza festa konsulta populár ba dahuluk depois tinan 20 (30 agostu 1999-30 agostu 2019).

Cipriano Belo informa, Xanana merese hetan agradesimentu husi povu tanba inisia selebrasaun loron konsulta populár iha territóriu laran tomak ne’ebé hetan entuziazmu husi ferik-katuas, juventude to’o labarik.

“Ha’u orgullu tebes ho festa konsulta populár ida nee tanba ne’e agradese ba maun boot Xanana Gusmão nu’udar prezidente komisaun organizadora ne’ebé hatudu konsiderasaun boot ba povu nia partisipasaun iha luta to’o termina timor nia destinu liu husi konsulta populár 30 agostu 1999,” Cipriano Belo hateten ba Ajénsia TATOLI, bainhira remata konsulta públiku lei kostumeiru iha sede Suku Opo, Lolotoe, foin lalais ne’e.

Nia hatutan, buat ne’ebé mak maun Xanana sente iha tinan 20 liu ba sai hanesan baze ka sasukat iha tinan 20 liu ba, oinsá populasaun hotuhotu iha timor laran tomak hakbesik aan ba sentru votasaun hodi ezerse nia direitu no ikus mai Nasoins Unidas konfirma katak Timor-Leste lakohi hamutuk ho Indonézia.

Estudante Universidade da Paz (UNPAZ), Roberto Freitas sente kontente tebes ho festa konsulta populár iha Tasi Tolu hodi fó onra ba povu nia luta.

“Nu’udar jerasaun foun hakarak agradese ba avó Nana (Xanana-red) ne’ebé mak iha domin boot ba rai no povu Timor-Leste,” hateten Roberto Freitas.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here