Traballadór timoroan sira iha Austrália hatudu drama Masakre Igreja Avé Maria Suai hodi komemora Tinan 20 Konsulta Populár. Imajen: Fausta da Costa

AUSTRÁLIA, 2 setembru 2019 (TATOLI)—Timoroan sira (seasonal worker) ne’ebé mak serbisu iha “Sundrop Farm”, South Austrália, promove istória no kultura Timor-Leste nian hanesan hatudu drama Masakre Suai, Dansa Kultura no Kanta hodi komemora Tinan 20 Konsulta Populár (30 agostu 1999-30 agostu 2019).  

Serimónia komemorasaun ne’e hala’o hamutuk ho to’os na’in, ajénsia, reprezentante Sekretaria Estadu Formasaun Profisionál no Empregu (SEFOPE), parte Igreja no komunidade Australianu sira iha MADEC Hall Village, Port Augusta, South Australia, sábadu (31/8/2019).

“Drama ne’ebé hatudu iha oin rua mak hanesan Loron Referendu 30 Agostu 1999 liubá nu’udar loron ne’ebé importante tebes ba timoroan hotu hodi partisipa iha prosesu votasaun no to’o ikus bele determina Timor-Leste nia destinu ba independénsia. Segundu mak kona-ba Masakre Suai ne’ebé milísia pro-integrasaun sira oho Padre Na’in tolu (3) hamutuk ho sarani sira iha Igreja Avé Maria Suai iha 6 setembru 1999,” dehan Vicente de Jesus Borges nu’udar naradór ba drama ne’e.

Traballadór timoroan sira iha Austrália hatudu Dansa Kultura Timor nian hodi komemora Tinan 20 Konsulta Populár. Imajen: Fausta da Costa

Naradora seluk, Adriana Jacinta, haktuir momentu ne’ebá ninia tinan foin sanulu resin haat (14) ne’ebé seidauk bele tuir votasaun no hafoin votasaun, ninia aman no inan desidi halai ba foho hodi subar, tanba situasaun komesa la seguru ona.

“Ami-nia família no maluk balun ne’ebé la halai ba foho no sira balun ba tuir misa iha Igreja Avé Maria Suai, sira mate hotu ho Padre na’in 3. Ha’u sente trauma no triste tanba lakon família barak iha Masakre ne’e,” Adriana haktuir.

Traballadór timoroan sira iha Austrália hatudu Dansa Kultura Timor nian hodi komemora Tinan 20 Konsulta Populár. Imajen: Fausta da Costa

Drama ne’e hala’o ho sentimentu tristeza no ramata ho poezia ida ne’ebé didika espesiál ba eroi sira ne’ebé mak sakrifika sira-nia aan ba luta Ukun Rasik-an, no drama ne’e xoke tebes partisipante sira-nia fuan no halo sira barak matan-ween turu.

Iha parte seluk, timoroan sira promove mós kultura no identidade Timor-leste nian liuhosi hatudu Dansa Kultura mak hanesan “Kolele Mai, Kitaro, Soru boek, Inalou, “Oh Hele Oh” no hatais kultura Timor nian mak hanesan Tais, Kaebauk, Mortein no Belak.

Brian Spartley hanesan Sundrop Farm Business and Marketing Manager, hato’o parabéns ba Timor-Leste no kontente tebes tanba bele hetan konvite hosi timoroan sira hodi partisipa iha komemorasaun ne’e.

“Ida ne’e hatudu katak timoroan bele promove no hatudu identidade Timor nian iha Austrália ne’ebé komunidade Austrália moris ho multikultura,” tenik Brian. Nia mós haksolok no apresia ba timoroan sira ne’ebé hatudu serbisu di’ak.

Nune’e mós, Virginia Lockwood, reprezentante hosi Ajénsia MADEC, hato’o parabéns ba Timor-Leste tomak liliu ba seasonal worker sira ne’ebé mak serbisu iha Sundrop tanba bele komemora loron Konsulta Populár ne’e ho di’ak no nia mós triste ho matan-ween tanba drama ne’ebé timoroan sira hatudu nakonu ho tristeza.

Entretantu, Cornélio Q. de Carvalho, reprezentante SEFOPE iha Austrália, hato’o agradese wa’in ba Austrália liliu Sundrop tanba bele ajuda timoroan sira hodi mai serbisu iha Austrália, no nia apresia tebes ba timoroan sira ne’ebé komemora loron importante ne’e tanba maski dook maibé la haluha loron istóriku ne’e.

Cornélio husik hela mensajen ba traballadór timoroan sira atu kontinua hatudu serbisu di’ak, kuidadu-aan no respeitu regra sira ne’ebé mak eziste iha Austrália nune’e bele hetan konfiansa nafatin hosi kompañia no ajénsia.

Reprezentante Team Leader Timor-Leste, Nicolau Piedade, hateten loron ne’e importante ba timoroan hotu hodi hakotu Timor nia destinu liuhosi votasaun no mós loron terminasaun intimidasaun no violénsia hosi milísia no militár Indonézia.

Nia apresia no agradese ba Kompañia Sundrop, MADEC, Reprezentante SEFOPE, parte Igreja, komunidade Port Augusta no kolega serbisu sira ne’ebé bele mai partisipa iha komemorasaun loron Konsulta Populár hamutuk ho timoroan sira.

Partisipa iha komemorasaun ne’e mak hanesan reprezentante Governu Timor-Leste,  Kompañia Sundrop, Ajénsia MADEC, Parte Igreja, komunidade Australiana no serbisu-na’in sira hosi nasaun seluk hanesan Vanuatu, Papua Nova Guinea, Filipina, Kenya, França no Indonézia.

Serimónia komemorasaun ne’e animadu tebes. Partisipante sira hatudu drama, dansa kultura, kanta, jantár hamutuk no taka ho dahur hamutuk.

Kontributór: Fausta da Costa

Editór: Xisto Freitas

 

HAKEREK NO HATÁN

Please enter your comment!
Please enter your name here