Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 2 setembru 2019 (TATOLI) – Prezidente Parlamentu Nasionál (PPN), Arão Noé de Jesus da Costa Amaral, observa durante ne’e ema barak mak preukupa ho osan fundu petrolíferu no kada tinan foti kuaze biliaun $2 hodi sustenta Orsamentu Jerál Estadu (OJE), tanba ne’e tenke buka meiu hodi hatama osan ba fundu.

Nia konsidera, partisipasaun Governu iha projetu Greater Sunrise hanesan meiu ida atu garante sustentabilidade fundu soberanu.

“Ita lakohi buka meiu hodi hatama osan ba fundu, hodi rai ba bei-oan sira. Tanba ne’e mak inisiativa hosi Maun Boot Xanana Gusmão halo atu garantia sustentabilidade fundu ne’e ninian. Ne’e mak ita sosa saham pursentu 56,56 para nune’e ita iha direitu tomak no ita bele hetan persentajen boot iha Greater Sunrise”, nia dehan ba Agência TATOLI iha Parlamentu Nasionál (PN), foin lais ne’e.

Nia dehan tan, ema hotu tauk osan iha fundu petrolíferu hotu maibé laiha ida mak hateten dehan oinsá mak buka osan hodi fundu ne’e labele hotu.

“Tinan-tinan ita foti no gasta, ita lahatene oinsá mak atu hatama ba fundu ne’e nune’e fundu ne’e nakonu nafatin”, PPN subliña.

PPN ko’alia kestaun ne’e relasiona ho Tribunál Rekursu (TR) deklara inskonstitusionalidade artigu balun iha alterasaun Lei Atividade Petrolífera no Lei Atividade Petrolífera, ne’ebé iha artigu balun mak fó kompeténsia ba Timor GAP hodi foti osan fundu petrolíferu la liuhosi pursentu 5, no TR konsidera kontra Konstituisaun RDTL artigu 149.

“Maun boot Xanana Gusmão esforsu liuhosi Governu, hodi aprezenta lejizlasaun no fó garantia nune’e Timor GAP bele jere”, dehan nia.

Nia klarifika, Timor GAP ba foti osan direitamente sein ema ida hatene, ne’e laloos.

“Osan ne’e Banku Sentrál mak jere no kontrolu hosi Ministériu Finansas, osan ne’e atu uza tenke autorizasaun hosi Governu liuhosi Ministériu Finansa no prosesu administrativu Banku Sentrál tenke aprova mak Timor GAP bele foti, la’ós hanesan péritu balun ko’alia”, dehan Arão Noé.

Maske lei rua ne’e iha artigu balun TR deklara inskonstitusionalidade no Prezidente Repúblika, Francisco Guterres Lú Olo foti desizaun deside veta, maibé nia promete sei halo esforsu hotu tuir kompeténsia PN nian.

Estadu Timor-Leste halo parte hanesan parseiru iha konsórsiu Greater Sunrise ho pursentu 56,56, Woodside (operadora) ho partisipasaun 33,44 no Osaka Gas pursentu 10.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here