Ministra Edukasaun, Juventude no Desportu Dulce de Jesus Soares .Imajen/TATOLI

DILI, 02 setembru 2019 (TATOLI) – Ministériu Edukasaun Juventude no Desportu (MEJD) sei prevee orsamentu rihun 100 itál hodi apoiu ekipa téknika Gráfika Nasionál Timor-Leste (GNTL) ba impresaun matéria ezame nasionál liuhusi subsídiu ba nutrisaun, apoiu transporte hodi tula ekipa sira ne’e bainhira fila ba uma iha tempu kalan atu nune’e bele garante servisu hotu bele la’o ho di’ak, tuir loron no data ne’ebé mak determina ona.

Ministra Edukasaun, Juventude no Desportu, Dulce de Jesus Soares hateten katak serbisu impresaun materiál ba ezame nasionál atu garante estudante 53,101 ninia vida ba futuru. Tan ne’e MEJD sei esforsu atu nune’e funsionáriu sira ne’ebé mak sei servisu oras 12 hodi prodús matéria ezame nasionál ne’e tenke iha kondisaun di’ak.

“Ha’u sei ko’alia ho Ministra Saúde iha enkontru Konsellu-Ministru atu nia bele ajuda hela pesoál saúde balun mai iha Gráfika Nasionál Timor-Leste ne’e hodi standby durante loron 30 nia laran,” hateten Ministra Dulce de Jesus Soares, iha GNTL, Colmera, segunda (02/09/2019).

Governante ne’e husu mós ba funsionáriu sira atu konsume bee barak hodi bele ajuda rekupera kondisaun fízika. Nune’e mós husu ba parte konsumidór atu enkomenda hahán ba ekipa téknika sira ne’e, maibé hahán ne’ebé tenke nutritivu. Hamenus mina no masin atu bele ajuda kondisaun fízika ekipa sira nian.

Notísia relevante:Impresaun Matéria Ezame Nasionál, MEJD Prepara Regra Ba GNTL

GNTL Sei Garante Segredu Matéria Ezame Nasionál

Jornalista : Tomé Amado

Editór       : Rafy Belo 

HAKEREK NO HATÁN

Please enter your comment!
Please enter your name here