Foto espesiál

DILI, 02 setembru 2019 (TATOLI)—Ida ne’e mak kantor/a sira di’ak liu ho lian osan-mean delegasaun husi Timor-Leste; Abito Gama, Cidalia, Chico Ramelau, Tonny Perreira. Mai akompaña sira hamutuk ho kantor/a sira husi Nasaun Asia iha Golden Memories Asia [2019], hahú iha Segunda (2 Setembru 2019). Live, iha Indosiar, tuku 20.30.

Fraze balun husi publisidade ne’ebé fó sai husi Indosiar [TV] iha leten ne’ebá ne’e, sadik timoroan sira atu tuba no nahe-aan iha ekran televizaun nia oin atu bele akompaña artista senior na’in haat ne’ebé reprezenta Timor-Leste hodi bele kompete ho kantor/a husi nasaun Asia  ne’ebé sei kompete iha kompetisaun Golden Memories Asia 2019 iha Indosiar, orsida kalan.

Objetivu halo kompetisaun “Golden Memories Asia 2019” atu hametin amizade entre nasaun Asia sira liuhusi arte. Tanba ko’alia kona-ba arte no dalen, buat rua ne’e mak sei halo nasaun Asia sira sai unidu. Atu hametin sira-nia amizade, daudaun ne’e delegasaun husi nasaun ida-idak halo preparasaun ba kalan-abertura (opening) hodi bele aprezenta buat ida di’ak liután.

“Ami-nia preparasaun iha Jakarta-Indonézia tuir regra sira ne’ebé komisaun organizadora sira orienta antes tama ba opening,” dehan konkorrente Golden Memories husi Timor-Leste, Chico Ramelau, ba Ajénsia TATOLI liuhusi entrevista via rede sosiál Facebook iha loron hirak liubá.

Nia hatutan, kona-ba konkorrente sira husi nasaun sira seluk (Indonézia, Filipina, Malázia, Singapura no Brunei Darusalam), agora daudaun ne’e sira hasé malu nakonu ho amizade. Tanba, nia hatutan, na’in ba programa Golden Memories Asia 2019 hateten katak labele haree liu ba kompetisaun maibé ne’e hanesan pasu ida atu bele kria amizade di’ak liután entre nasaun Asia.

Agora daudaun, nia informa, delegasaun sira husi nasaun Asia sira seluk inklui uma-na’in Indonézia, sira hotu hela hamutuk iha Hotel Grand Tropical, Jakarta Barat, Indonézia, ne’ebé nakonu ho amizade .

Entretantu, nia haktuir, preparasaun ba serimónia Kalan Abertura (opening) sira halo ona preparasaun durante sira to’o iha Jakarta iha semana kotuk. Nia agradese tanba bele hetan no hasoru treinadór sira ne’ebé mesak profisionál ne’ebé serbisu ho profisionál tuir ida-idak ninia área.

Delegasaun Timor-Leste sei hananu múzika saida iha kalan abertura ne’e, nia hatán, segredu ba kompetisaun ida-nian labele sobu uluk. Kanta múzika saida, ne’e hela ba segredu. Maibé, nia husu ba timoroan sira atu fó suporta ba sira na’in haat para bele aprezenta di’ak liután iha kalan abertura ne’e. Keta haluha! Akompaña kompetisaun Golden Memories Asia 2019 iha Indosiar.

Notísia relevante:Artista Seniór Timoroan Haat Eleitu Reprezenta TL Kompete Iha “Golden Memories Asia 2019”

Jornalista: Cancio Ximenes

Editór      : Rafy Belo

HAKEREK NO HATÁN

Please enter your comment!
Please enter your name here