Sekretáriu Estadu Juventude no Desportu, Nélio Isaac Sarmento. Imajen/Tatoli

DILI, 2 setembru 2019 (TATOLI) – Sekretáriu Estadu Juventude no Desportu (SEJD), Nélio Isaac Sarmento, afirma jogu Komunidade Nasaun Ko’alia Lian Portugés (CPLP- sigla Portugés) hala’o iha Timor- Leste (TL) bele promove mós turizmu no kultura Timor nian ba mundu internasionál.

“Ita iha ona komisaun teknikú ida ne’ebé koordena hosi Sekretaria Estadu Juventude no Desportu. Iha mós Komisaun Nasionál ida ne’ebé Ministra Edukasaun Juventude no Desportu mak kordena, entaun ita sei haree hodi koordena malu oinsá jogu CPLP ne’e bele promove mós poténsia turizmu ka kultura inklui mós ita nia hahán,” dehan Nélio iha Paláçio do Governo, ohin.

Nia hatutan, kondisaun infraestrutura hodi realiza jogu refere dadauk ne’e Governu prepara hela hanesan sei halo rehabilitasaun ba Jináziu Dili no Estádiu Munisipál oras ne’e iha hela proselu rehabilitasaun nia laran. Enkuantu, fatin ida mak Estádiu Munisipál Café de Ermera preparadu ona.

“Jogu CPLP ne’e bazeia de’it ba kondisaun ita-nian. Kondisaun ita prepara hela, hanesan prepara ba hadi’a kampu voleiból, basketból iha Jináziu Dili, modalidade ualu ne’ebé atu partisipa ne’e kondisaun ita prepara hela ona,” nia haklaken.

Tanba ne’e, oras ne’e dadauk Governu prepara hela publisidade online nune’e bele loke ona oportunidade ba nasaun hotu iha CPLP bele hala’o ona rejistrasaun ba sira-nia atleta.

Entretantu, relasiona konkursu ba kompañia ne’ebé atu halo rehabilitasaun ba Jináziu Dili hala’o ona iha fulan hirak liu-ba maibé Governu sei haree hela kompañia ne’ebé mak merese atu kaer obra refere nune’e bele aselera tuir alvu.

Tuir oráriu ne’ebé iha, jogu CPLP sei hahú iha jullu tinan oin durante fulan ida.

Nasaun sira ne’ebé atu partisipa jogu refere mak hanesan Angola, Cabo Verde, Brazíl, Portugal, Guiné Bissau, São Tome e Príncipe no Timor – Leste.

Orsamentu ba jogu ne’e, Governu aprova ona rezolusaun ida liuhosi reuniaun Konsellu Ministru (KM) iha ne’ebé prevee ona totál orsamentu milaun 2.3 hodi realiza eventu ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here