Ministru Defeza no Ministru Interiór interinu, Filomeno da Paixão de Jesus. Imajen/Egas Cristovão

DILI, 2 setembru 2019 (TATOLI) – Primeiru-Ministru (PM), Taur Matan Ruak, konvida Ministru Defeza no Seguransa, Filomeno Paixão de Jesus, hodi ko’alia kona-ba seguransa fronteira marítima, hafoin tratadu fronteira marítima ho Austrália taha iha vigór ona.

“Ohin bolu ha’u mai enkontru atu ko’alia kona-ba seguransa marítima. Agora ita nia fronteira marka ona, agora ita tenke hare seguransa, parte ne’ebé pertense mai ita, kona-ba seguransa ita tenke hare meiu marítima, forsa marítima, autoridade marítima, atu ita bele prepara-án para ita bele fó seguransa ba tasi”, tenik Filomeno Paixão ba jornalista sira, iha Palásiu Governu, segunda ne’e.

Nia dehan, Governu iha ona planu atu hola meiu seguransa marítima ba tinan oin, nune’e bele fó seguransa ba autoridade.

“Ita hola ho pakote tomak, manutensaun, treinu, oinsá kona-ba infraestrutura no hasai ró hodi hadia. Orsamentu seidauk iha, agora atu halo estudu no tur hamutuk ministériu relevante sira para bele deskute di’ak liután”, nia akresenta.

Nia subliña, komponente navál hanesan guarda kosteira ida ne’ebé tenke iha duni maibé seidauk hakat ba komponente navál.

“Ita la’os forma meiu atu funu maibé meiu guarda kosteira atu fó seguransa ba área marítima liliu hare ba tráfiku ilegal. Agora ita ko’alia komponente ki’ikoan ida hodi fó apoiu no halo vijilánsia, hare ró ahi ilegál tama ka la’e, atividade ilegál no fó hatene ba komponente navál atu halo atuasaun.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here