Prizoneiru sira iha kareta laran hodi muda ba Prizaun Suai, Segunda (1/09/2019). Imajen/Antonio Goncalves

DILI, 2 setembru 2019 (TATOLI)-Prezidente Komisaun organizadora ba loron konsulta popular, Kay Rala Xanana Gusmão,  aloka orsamentu $7.000 ba prizaun  tolu hanesan Becora ho valor $3.000 Suai ($2.000) ho Gleno ($2.000).

Objetivu husi alokasaun orsamentu ne’e  atu halo atividade  desportu  iha prizaun laran hanesan, boli bola , basket bola no atividade rekreativu seluk tan.

Alien de ida nee, iha atividade importante seluk mak hanesan serimónia isar bandeira hahú husi loron 30 Agostu, doasaun ran voluntáriamente iha Ospitál Nasional Guido Valadares (HNGV).

“Ami mos divulga sira nia matenek ne’ebé sira tau iha artezanatu husi loron 30 Agostu to’o 4 Setembru, sei halo  feira ki’ik oan ida atu demonstra dadur sira nia abilidade no tau iha asaun konkreta,” informa Diretór Prizaun Becora, João Domingos ba Ajénsia TATOLI, foin lalais ne’e, liu husi telefone.

Nia dehan, iha sesta liu ba prizaun Becora, Suai ho Gleno realiza atividade sira atu komemora loron konsulta Popular no mós prezensa INTERFET iha  Timor-Leste ba tinan 20 liu ba.

Nia haktuir, sidadaun  hot-hotu iha direitu atu komemora no halo reflesaun  katak saida mak akontese iha tinan 20 liu ba ne’ebé mós envolve dadur balun. Tanba ne’e mak la bele ignora dadur sira nia partisipasaun ba dezenvolvimentu ne’ebé sira involve inklui  mós guarda prizioneiru sira iha prizaun sira.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here