Diretór Jerál Asuntu ASEAN, Jorge Trindade Camões. Foto TATOLI: António Gonçalves

DILI, 02 setembru 2019 (TATOLI)-Governu Timor-Leste liuhusi Ministériu Negósiu Estranjeiru no Kooperasaun (MNEK), aban, sei simu ekipa husi ASEAN “Fact-Finding Mission” ba polítika, no seguransa, nian ne’ebé mak sei to’o iha Timor-Leste.

“Atu halo avaliasaun, diskute ho ita-nia lideransa sira, nune’e mós grupu tékniku husi liña ministeriál, halo preparasaun preparativu hothotu ne’ebé ba prosesu adezaun ba ASEAN,” hateten Diretór Jerál Asuntu ASEAN, Jorge Trindade Neves Camões ba jornalista sira, liuhusi Konferénsia Imprensa iha Sala Diplomátiku, MNEK, Praia dos Coqueiros, Dili, ohin.

Diretór Jorge Camões informa, prosesu adezaun ba ASEAN ne’e prioridade estadu nian. Tan ne’e, grupu tékniku halo esforsu ba buat hotu ne’ebé presiza, atu bele asegura prosesu adezaun Timor-Leste ba ASEAN.

“Momentu ida ne’e, momentu krítiku tebes, husu oportunu tanba ita-nia prosesu adezaun ba ASEAN ne’e, nia hetan nia pasu pozitivu tanba depois ita-nia ASEAN foin daudauk ne’e ita hetan konfirmasaun husi país ASEAN hothotu kona-ba apoiu sira nian ba ita-nia prosesu adezaun ba ASEAN ne’e,” hateten diretór ASEAN ne’e.

Nia informa, Iha komunika ida ne’ebé husi Ministériu Negósiu Estranjeiru ASEAN ninian rekoñese progresu pozitivu ne’ebé Timor-Leste halo iha nia prosesu preparasaun ba ASEAN. “Sira haree mós ita-nia delegasaun foin daudauk ba iha ASEAN halo diskusaun hamutuk ho Sekretáriu Jerál ASEAN nian kona-ba oinsá ita atu familiariza ita-nia aan atu envolve ita-nia aan besik liután ba ASEAN, bele asegura ita-nia prosesu adezaun ba ASEAN ne’e”.

Diretór ne’e esplika katak prosesu sira ne’e hotu mak lori ita to’o iha étapa ida ne’ebé ekipa “Fact Finding Mission” sei to’o mai iha ne’e, atu halo diskusaun intensa ho ita-nia governante balun ho ita-nia pesoa eminente sira ho grupu tékniku kona-ba ita-nia prosesu adezaun ba ASEAN.

Nia informa tan, ita hotu hatene katak prosesu adezaun ba ASEAN ne’e sei iha nia impaktu ne’ebé pozitivu tebetebes ba país, em termos de ekonomia, polítika no mós seguransa.

“Timor-Leste ekipa téknika sira halo esforsu di’ak tebetebes iha área hothotu. Iha momentu ne’e, ha’u bele dehan katak, ekipa Fact-Finding Mission ne’e mai husi parte polítiku no seguransa. Maibé, iha mós ekipa ida reprezentante husi pilár seluk nian ida; pilár ekonomia no sósiu-kulturál, maibé Fact-Finding Mission sei fokus liu ba polítiku, seguransa nian”.

Diretor Jeral Jorge Camões hateten, ita haree katak ASEAN organizasaun ida dinámiku tebetebes, foin faze ba centrality ba ASEAN sira seluk ba desizaun hothotu ba polítika nian, ekonomia nian, no seguransa. “Tanbá ne’e, ha’u hanoin ita-nia adezaun ba ASEAN sei iha nia impaktu pozitivu ba ita-nia rai”.

Nia informa tan katak, Timór nia jeografikamente, ita lokalizadu iha área interzentiku tebetebes, pasífiku iha ASEAN. Entaun ho buat hotu-hotu ne’ebé ita halo, sei iha nia impaktu.

“Hanesan ita interese komún entre ita ho país ASEAN nian, entaun ita sei iha buat ne’ebé ita halo, iha nia impaktu iha ambiente nian, iha seguransa no mós iha ambiente, oinsá ita mós bele serbisu hamutuk ho jestaun dezastre sira,” tenik Diretór Jorge Camões.

Diretór ne’e hatutan, bele dehan katak prosesu preparasaun la’o di’ak tebetebes, ita sei dehan ba país ASEAN sira hotu, ita prontu atu bele serbisu hamutuk ho sira, atu sai membru ASEAN ninian. “Buat ne’ebé lori ita atu halo ita-nia serbisu ba prosesu adezaun nian, tanba ita hatene jeografikamente ita lokalizadu iha Ázia Sudeste Aziátiku, ita mós hanesan rekoñesidu tiha ona”.

Nia hatutan tan katak, hanesan país ida ne’ebé independente husi país membru ASEAN sira hothotu, ita mós espresa ita-nia vontade atu kumpre regulamentu sira hotu, prosedimentu sira hotu ba prosesu adezaun ba ASEAN. “Ita mós haree katak ita iha atividade, iha vontade atu kumpre rekizitu ASEAN nian hothotu”.

Diretór Jerál Asuntu ASEAN, Jorge Trindade Camões esplika, prosesu adezaun nia ba ASEAN ne’e, hanesan esforsu tomak estadu nian, ne’ebé mak envolve liña ministeriál sira. “Ita boot sira (jornalista) hatene, ita-boot sira akompaña katak, iha momentu balun iha kotuk, ita-nia Konsellu-Ministru hasai tiha ona, rezolusaun ida atu fó kna’ar ba Ministériu Negósiu Estranjeiru atu bele organiza ho liña ministeriál hothotu kona-ba preparativu ba prosesu adezaun ba ASEAN”.

“Ita iha preparasaun ne’e ita dezenvolve tiha ona programa TLAMP, programa mobilizasaun Timor-Leste nian ba ASEAN bolu naran TLAMP maibé ita hatene TLAMP ne’e programa ida naruk tebetebes, entaun prosesu ne’e ita halo ezersísiu hamutuk ho liña ministeriál sira, ita tenke halo badak, ita prioritiza asuntu balun atu nune’e ita haree katak, antes ita ba prosesu adezaun ba ASEAN ne’e, saída mak ita bele prepara, atu nune’e bele asegura katak ita bele prienxe rekizitu balun, ba prosesu adezaun ba ASEAN”.

Nia reforsa: “Iha prosesu preparasaun ami dezenvolve fila-fali inisiativa ida naran elementu krítiku ba prosesu adezaun ba ASEAN nian, iha ne’ebá ami prioritiza asuntu balun ne’ebé ami haree importante iha área ekonomia ninian, polítiku ninian no mós sósiu-kulturál ninian.  “Aban, sira sei to’o mai iha ne’e, ita sei halo enkontru hamutuk ho sira, iha nível tékniku no mós ho nível governante sira no mós pesoa eminente Timor-Leste nian”.

Diretór Jerál Asuntu ASEAN informa, iha delegasaun ne’e iha 60 pesoa,  ne’e mai husi kapitál na’in 10 hamutuk ho SOM (Senior Official Meeting) lider sira. “Husi kapitál hamutuk ho sira-nia ekipa téknika, nune’e mós sei mai husi Jakarta, permanente ba ASEAN nian bolu CPR hamutuk na’in 10 hamutuk ho tékniku sira, ho nune’e mós ho Deputy (Adjuntu) Sekretáriu Jerál ASEAN nian”.

Entertantu, husi Vizita ekipa ASEAN “Fact-Finding Mission” sei to’o iha Timor-Leste iha 3 setembru no sei halo diskusaun iha dia 4 to’o 5, sira sei fila fali iha dia 6 setembru.

Notísia relevante:Setembru, Ekipa “Fact-Finding” ASEAN Sei Mai Timor-Leste  

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here