Jogadór ekipa rua, Académica FC no AD SLB kontra malu iha Estádiu Munisipál Dili, ohin. Imajen Tatoli/ Hortençio Sanchez

DILI, 1 setembru 2019 (TATOLI) – Académica FC, klube estimadu hosi Universidade Nacional Timor Lorosa’e (UNTL) kontinua hamriik iha zona dezpromosaun ho pontu 7 hamutuk ho Atlético Ultramar iha tabela klasifikasaun provizória Liga Futeból Amadora (LFA) époka 2019.

Iha jornada sanulu resin ida ohin iha Estádiu Munisipál Dili, ekipa UNTL ne’e tenke fahe de’it pontu ho armada Makikit Laulara alias AD SLB tanba impata 1-1 durante minutu 90+3.

Enkuantu, ekipa Laulara mantein iha zona seguru ho pontu 16. Golu SLB prodúz hosi jogadór Mouzinho de Lima (10) iha minutu 4 no golu Académica marka hosi Juvenal Boavida (10) iha minutu 45.

Jogu refere dirije hosi árbitru Nívio Fernandes, juiz liña Eufrásio Reis, Juvenal Lopez no árbitru rezerva, Pedro Carvalho.

Entretatu, tuir pontu provizóriu tabela klasifikasaun, Lalenok United FC, Boavista FC Timor no Assalam FC mak kandidatu forte atu sai kampiaun époka ida ne’e maibé sei iha oportunidade jogu haat ba ekipa tolu ne’e atu hadau malu.

Jornalista: Hortençio Sanchez

Jornalista: Xisto Freitas

HAKEREK NO HATÁN

Please enter your comment!
Please enter your name here