Lider nasionál, Xanana Gusmão, fahe bulaun ba ki'ik-oan sira hosi rohan ba rohan bainhira festeza loron referendu ba dala 20 iha Tasitolu, kalan ne'e (31/8). Imajen TATOLI/ Rita Almeida

DILI, 31 agostu 2019 (TATOLI) – Lider nasionál, Kay Rala Xanana Gusmão, husu ba joven sira atu tane Nasaun ho badinas servisu no estuda, nune’e bele partisipa iha prosesu dezenvolvimentu Nasaun.

Ámbitu selebrasaun referendu no prezensa forsa internasionál iha Timor-Leste (INTERFET-sigla inglés) ne’ebé hala’o iha Tasitolu, kalan ne’e ho komunidade tomak, Xanana rekoñese Estadu ne’e sei hasoru problema lubun, ne’ebe presiza tempu atu rezolve.

Lider nasionál, Xanana Gusmão, fahe bulaun ba ki’ik-oan sira hosi rohan ba rohan bainhira festeza loron referendu ba dala 20 iha Tasitolu, kalan ne’e (31/8). Imajen TATOLI/ Rita Almeida

“Ita iha ukun-án nian laran, loos duni katak buat hotu seidauk bele halo, Estadu sei hasoru problema atu fó servisu ba imi hotu (joven sira)”, dehan nia perante foin-sa’e sira ne’ebé halibur ho ksolok iha Tasitolu.

Nia enkoraza juventude hodi haktuir, Nasaun lubun ne’ebé ukun-án uluk ho tinan barak, sei hakdasak.

Mesmu nune’e, timoroan tomak, liuliu joven sira, nia dehan tenke haka’as-án no prepara-án atu hetan kbi’it tanba servisu sei mai.

“Timoroan mak tenke hatudu katak la baruk atu servisu maka’as”, afirma Prezidente komisaun organizadór ba selebrasaun loron konsulta populár.

Tanba, distinu Nasaun iha juventude nia liman, nune’e nia afirma hodi husu atu hadomi malu, labele estraga malu tanba triste no matan been sei husik ba inan aman sira.

Eis-Prezidente Repúblika ne’e esklarese ba joven sira katak funu ne’e, povu mak manán, la’ós nia (Xanana).

Selebrasaun ho atividade divertimentu hosi banda múzika, grupu kulturál no seluk tán anima tebes komunidade ne’ebé maioria joven.

Konsertu ne’e la’o ho ksolok no seguru tanba hetan seguransa másima hosi Polísia Nasionál Timor-Leste.

Jornalista: Rita Almeida

Editór: Rafael Belo

HAKEREK NO HATÁN

Please enter your comment!
Please enter your name here