Ministru Estadu ba Assuntu Defeza no Estranjeiru Singapura, Mohamad Maliki. Imajen/TATOLI/Eugénio Pereira

DILI, 31 agostu 2019 (TATOLI) – Ministru Defeza no Ministru Interiór Interinu Brigadeiru Jenerál Filomeno da Paixão de Jesus, sorumutu ho Ministru Estadu ba Asuntu Defeza no Estranjeiru Singapura, Mohamad Maliki, hodi ko’alia kooperasaun servisu iha setór defeza.

Mohamad dehan, Singapura prontu atu hametin liután kooperasaun defeza ho Timor-Leste.

Durante hasoru malu iha edifísiu defeza Fatuhada, ohin ministru ne’e mós konvida ninia omologu atu vizita Singapura atu hakle’an kooperasaun iha área seluk.

Ministru ne’e dehan Singapura iha disponibilidade tomak atu apoiu funsionáriu sivíl husi Ministériu Defeza inklui F-FDTL ne’ebé hakarak ba frekuenta estudu ka treinamentu ruma iha Singapura.

Mohamad apresia ba Estadu Timor-Leste hodi konvida Governu Singapura mai partisipa iha festa populár referendu no prezensa forsa internasionál iha TL (INTREFET-sigla inglés) ba dala 20.

Iha fatin hanesan, Ministru Filomeno Paixão, agradese ba apoiu tomak husi Singapura liliu ba partisipasaun forsa armada Singapura nian iha misaun dame ONU nian iha 1999.

Ministru mós expresa interese hodi hametin liután koperasaun no parseria iha área defeza ho Singapura.

Nu’udar país ida iha rejiaun sudeste aziátika, Timor-Leste tenta estabelese koopereasaun defeza ho membru Nasaun sudeste aziátika sira ne’ebé halibur án iha organizasaun ASEAN (sigla inglés).

Jornalista : Eugénio Pereira

Editora: Rita Almeida

HAKEREK NO HATÁN

Please enter your comment!
Please enter your name here