Sekretáriu Adjuntu ba Diresaun Asuntu Ázia Leste no Pasífiku EUA, David Stilwell no Xefe Negosiadór ba Asuntu Fronteira Marítima no Terestre, Kay Rala Xanana Gusmão. Imajen TATOLI/Egas Cristovão

DILI, 31 agostu 2019 (TATOLI) – Xefe Nogosiadór ba Asuntu Fronteira Marítima no Terestre, Kay Rala Xanana Gusmão, simu vizita kortezia husi Sekretáriu Adjuntu ba Diresaun Asuntu Ázia Leste no Pasífiku Estadu Unidu Amérika (EUA), David Stilwell no ninia delegasaun, iha Palásiu Governu.

David Stilwell hateten, enkontru ne’e hanesan ninia atividade ikus durante estadia iha Timor-Leste no antes ne’e nia hasoru malu ho líder barak, nia mós haktuir enkontru sira ne’e produtivu tebes.

“Ha’u haksolok selebra tinan 20 Referendum, ha’u mós apresia ho timoroan sira nia ospitalidade, espera katak bele kontinua nafatin kooperasaun barak liután iha futuru”, nia tenik ba jornalista sira, sábadu ne’e.

Xefe Nogosiadór ba Asuntu Fronteira Marítima no Terestre, Kay Rala Xanana Gusmão, bainhira halo enkontru ho Sekretáriu Adjuntu ba Diresaun Asuntu Ázia Leste no Pasífiku EUA, David Stilwell no ninia delegasaun, iha Gabinete Fronteira Marítima, Palásiu Governu, sábadu (31/8). Imajen TATOLI/Egas Cristovão

Nia hatutan: “Hau onradu hasoru malu ho Xanana Gusmão, ema ho reputasaun boot no koñesidu iha mundu, enkontru ne’e furak tebes”.

Nia haktuir, enkontru ohin ko’alia espesífikamente kona-ba enerjia nomós kooperasaun seluk ne’ebé bele benefisia Governu EUA no Timor-Leste.

Parte seluk, Reprezentante Xefe Negosiadór, Roberto Soares, hateten delegasaun ne’e aleinde partisipa iha komemorasaun loron Referendum, sira mós hare progresu dezenvolvimentu iha Timor-Leste, no aproveita oportunidade hodi kontinua nafatin reitera prontidaun EUA hodi mantein nafatin kooperasaun.

“Sira prontu esplora área sira ne’ebé mak tuir nesesidade Timor-Leste nia hodi aprofunda liután kooperasaun bilaterál ho EUA”, nia dehan.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here