Ministru Obra Públika no Abitasaun Indonézia, Mochamad Basuki Hadimuljono, no Ministru Obra Públika, Salvador Eugénio Soares dos Reis Pires. Foto/Mídia MOP.

DILI, 31 agostu 2019 (TATOLI)-Ministru Obra Públika no Abitasaun Indonézia, Mochamad Basuki Hadimuljono, hatete planu interkonesaun elétrika husi Timor-Leste bá Timor Osidentál (NTT, sigla indonézia) ne’e nia sei informa ba ministru kompetente Indonezia nian.

“Ne’e Presiza diskusaun kle’an iha nivel polítiku entre Governu rua, mas ha’u sei hato’o ba ministru”, Ministru Mochamad Basuki Hadimuljono, informa iha Otél Novu Turizmu, Lesidere, ohin.

Tanba Ministru Indonéziu ne’e dehan iha NTT konstrui ona barrajen bee ne’ebé boot iha Kefamenanu ne’ebé mós planu sei prodús enerjia eletrisidade ne’ebé boot.

Iha fatin hanesan, Ministru Obra Públika, Salvador Eugénio Soares dos Reis Pires, dehan planu projetu interkonesaun enerjia eletrisidade ba Timor osidentál ne’e presiza duni diskusaun kle’an iha nivél polítika entre Governu Timor-Leste no Indonézia.

“Ami hato’o ona ba Ministru Obra Públika no Abitasaun Indonézia, Mochamad Basuki Hadimuljono atu fila bá Indonézia bele hato’o ba Ministru Enerjia Indonézia no ita hein took nia rezultadu”, Ministru Salvador katak.

Nia salienta, iha podér tomak atu hato’o ba Ministru Indonéziu ne’e tanba Konsellu Ministru fó plenu podér ona atu halo negosiasaun ho Indonézia ba projetu interkonesaun ne’e.

“Ne’e Presiza diskusaun kle’an liu iha nivel polítiku entre nasaun rua atu haree posibilidade ba interkonesaun”, salienta.

Ministru dehan hahú estabelese ekipa interministeriál ida liuliu Ministériu Obra Públika (MOP) no Ministériu Negósiu Estranjeiru no Kooperasaun atu negosia ho Indonézia ba potensialidade halo projetu interkonesaun enerjia ne’e ba Timor Osidentál.

Estudu hatudu vantajen balun husi interkonesaun rejionál no posibilidade Timor-Leste komersializa eletrisidade ho Indonézia.

Esportasaun eletrisidade ne’e liuhosi produsaun sentru elétriku Hera no Betanu tanba sentrál rua produsaun enerjia  por volta 50 MW. Projetu ne’e bazeia ba nota entendimentu iha tinan 2014 nian.

Notísia relevante : Projetu Interkonesaun Elétrika ho Timor Osidentál Sei Fó Retornu Ba Timor-Leste

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here