DILI, 31 agostu 2019 (TATOLI)-Ministru Obra Públika no Abitasaun Indonézia, Mochamad Basuki Hadimuljono, hatete haree ba dezenvolvimentu infraestrutura bázika hanesan eletrisidade, estrada no bee inklui saneamentu iha Timor-Leste hatudu progresu di’ak tebes.
“Ha’u kontente haree Timor-Leste tanba ha’u mós uluk hela iha ne’e, maibé agora infrastrutura bázika iha Timor-Leste hatudu progresu di’ak sei ita kompara iha tempu ne’ebá”, Ministru Mochamad Basuki dehan iha ámbitu enkontru bilaterál ho Ministru Obra Públika Salvador Eugénio Soares dos Reis Pires, iha Otél Novu Turizmu, Lesidere, ohin.
Ministru Indonéziu ne’e dehan populasaun Timor-Leste kuaze hotu-hotu asesu ona enerjia eletrisidade, estrada no bee ne’e pasu pozitivu tebes.
Nune’e nia sujere mós ba Ministru Obra Públika katak iha Timor-Leste ne’e karik presiza bee hanesan Indonézia parte Nusa Tenggara Timur (NTT) tanba iha NTT konstrui ona barrajen bee hitu.
“Ne’ebé ha’u husu kolega Ministru Salvador katak Timor-Leste hakarak dezenvolve agrikultór no moris populasaun ne’e tenke iha bee”.
Nia dehan konstrui barrajen bee ne’e fó impaktu pozitivu tebes tanba bele apoiu iha setór barak hanesan prodús enerjia renovavel, agrikultura no seluk tan.
Mochamad Basuki subliña husi Estadu Indonézia kontinua afirma kompromisu atu apoia no ajuda nafatin liuhusi kooperasaun ho Governu Timor-Leste liuliu iha setór dezenvolvimentu infraestrutura no kapasitasaun rekursu umanu iha setór obra públika nian.
Iha 2011, Indonézia ho Timor-Leste asina ona memoradu entendimentu (MoU, sigla inglés) atu fó kapasitasaun rekursu umanu no haruka konsultór sira atu fó asisténsia téknika ba obra Estadu Timor-Leste nian, maibé mandatu MoU sei hotu iha dezembru tinan ne’e (2019).
“Ami atubele kontinua programa kapasitasaun ne’e no ko’alia mós setór ne’ebé de’it mak Timor-Leste hakarak atu Indonézia ajuda”, akresenta.
Iha fatin hanesan, Ministru Obra Públika Salvadór Eugénio Soares dos Reis Pires dehan presiza duni konstrui barrajen bee no sei haruka ekipa espesializadu atu hala’o estudu ba konstrusaun barrajen bee ne’e iha Timor-Leste.
Timor-Leste kontinua hametin kooperasaun liuliu iha programa bee nian ne’ebé sei diskute kle’an entre Embaixadór Indonézia iha Timor-Leste no Governu Timor-Leste. “Maibé sira prontu apoia ita”, katak Salvador.
Ministru Indonéziu Mochamad Basuki Hadimuljono reprezenta Xefe Estadu Indonézia, Joko Widodo, hodi mai partisipa iha komemorasaun Loron Konsulta Populár ba dala-20 (30 agostu 1999-30 agostu 2019) no mós inaugura ponte B.J. Habibie iha 29 agostu bainhira nia to’o iha Timor-Leste.
Notísia relevante : Indonézia Prontu fó Asisténsia Téknika ba Planu Abitasaun
Jornalista : Florencio Miranda Ximenes
Editora : Maria Auxiliadora
