Ministru Obra Públika no Abitasaun Públika Indonézia, Basuki Hadimuljono (karuk) ho Ministru Obra Públika, Salvador Eugénio Soares dos Reis Pires (loos) ko'alia kona-ba Kooperasaun Timor-Leste ho Indonézia. Imajen/TATOLI.

DILI, 31 agostu 2019 (TATOLI)-Governu liuhosi Ministru Obra Públika, Salvador Eugénio Soares dos Reis Pires, agradese ba Prezidente Repúblika Indonézia Joko Widodo liuhosi nia reprezentante ofisiál Ministru Obra Públika no Abitasaun, Mochamad Basuki Hadimuljono, ne’ebé mai partisipa direta komemorasaun Loron Konsulta Populár ba dala-20 (30 agostu 1999-30 agostu 2019).

“Agradese ba Governu Indonézia liuliu Prezidente Indonézia nia tanba delega nia Ministru Obra Públika no Abitasaun atu mai partisipa ita-nia loron importante ne’e”, Ministru Salvador dehan hafoin enkontru bilaterál ho Ministru Indonéziu, iha Otél Novu Turzimu, Lesidere, ohin.

Ministru Salvadór dehan liuhusi disponibilidade partisipa Loron Konsulta Populár ne’e hatudu duni Governu Indonézia nia kompromisu atu apoia nafatin Timor-Leste (TL) nia prosesu dezenvolvimentu iha futuru.

Iha fatin hanesan, Ministru Obra Públika no Abitasaun Indonézia, Mochamad Basuki Hadimuljono, mós agradese ba Governu Timor-Leste tanba bele konvida sira atu partisipa Loron Konsulta Populár ba dala-20 ne’e.

“Ha’u lori Prezidente Repúblika Indonezia nia naran agradese Estadu Timor-Leste tanba konvida ami partisipa loron importante ne’e no ha’u sente kontente tebes tanba uluk ha’u mos iha ne’e (Timór)”, nia relata.

Ministru Obra Públika Indonézia ne’e, reprezenta Prezidente Repúblika Joko Widodo hodi hala’o inaugurasaun ba Ponte no Jardín Prezidente B.J. Habibie  iha Bidau Santa Ana, Munisípiu Dili, iha 29 agostu ne’e.

Aléinde ne’e partisipa mós troka Nota Diplomátika ba rafikasaun Tratadu Fronteira Marítima entre Timor-Leste no Austrália,  inklui hala’o enkontru bilaterál.

Ministru Obra Públika no Abitasaun Indonézia ne’e, ohin lokraik   14:00 OTL ne’e, fila hikas ona bá Indonézia ho aviaun Citilink.

Jornalista : Florencio Miranda Ximenes  

Editora : Maria Auxiliadora 

HAKEREK NO HATÁN

Please enter your comment!
Please enter your name here