Espoza Prezidente Repúblika (PR), Cidália Lopez Nobre Mouzinho Guterres, realiza enkontru ho Carolina Lariera, espoza saudozu Sergio Vieira de Mello. Imajen Mídia PR

DILI, 31 agostu 2019 (TATOLI)—Iha 31  agostu, espoza Prezidente Repúblika (PR), Cidália Lopez Nobre Mouzinho Guterres realiza enkontru ho Carolina Lariera, espoza saudozu Sergio Vieira de Mello ne’ebé partisipa iha komemorasaun aniversáriu tinan-20 referendu.

Durante enkontru iha Gabinete  Espoza Prezidente Repúblika, Bairru Pité, Cidália agradese kontribuisaun hosi Reprezentante Sekretáriu Jerál Organizasaun Nasaun Unida (ONU) durante prosesu tranzisaun hodi harii instituisaun demokrátika sira iha nasaun foun.

Espoza Prezidente Repúblika ho Carolina Lariera haree mós posibilidade oinsá bele serbisu hamutuk atu tau-matan ba Eskola Sergio Vieira de Mello iha Becora, Dili.

Tuir espoza PR katak kna’ar tau-matan ba eskola nu’udar kna’ar Governu ninian maibé sei koopera ho entidade relevante hodi hadi’ak liu kondisaun eskola refere.

Carolina Lariera mós hateten katak hakarak kumprimenta espoza no agradese profundamente konvite hosi Estadu hodi bele partisipa iha komemorasaun aniversáriu tinan-20 referendu.

Carolina Lariera kontente haree progresu sira ne’ebé nasaun atinje, liliu Timor-Leste bele eradika ona moras malária tanba la’ós fásil atu halo ida ne’e. Maski nune’e, Timor-Leste sei hasoru dezafiu barak iha oin mai, liliu iha área edukasaun.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here