Asaun solidaridade balun hosi Rede Asaun ba Timor-Leste no Indonézia (ETAN-sigla inglés). Imajen ETAN

DILI, 30 agostu 2019 (TATOLI) – Povu Timor-Leste liuhosi Prezidente Repúblika, Francisco Guterres Lú Olo, la haluha agradese ba komunidade internasionál no Nasaun sira ne’ebé ko’alia lian-portugés ne’ebé kontribui Timor nian luta ba ukun rasik án.

“Ita la haluha País sira ne’ebé ko’alia lian-portugés, iha Áfrika, ne’ebé sai retaguarda estratéjika ba ita-nia luta diplomátika, iha ita-nia luta libertasaun nasionál”, Xefe Estadu akresenta iha ninia diskursu ba selebrasaun tinan 20 loron konsulta populár no prezensa forsa internasionál iha Timor-Leste (INTERFET-sigla inglés) iha Tasitolu, kalan ne’e.

Nia hatutan: “País sira ne’e mak tanen ita-nia mehi ukun-án husi kedas 1974, bainhira ita hahú organiza-án”.

Durante diskursu, Lú Olo haktuir rezisténsia Timoroan sira nian forsa liután bainhira Amu Bispu, Don Carlos Filipe Ximenes Belo hakerek karta ba Nasaun Naklibur sira (ONU-sigla portugés) iha 1989 hodi husu referendu iha TL.

Forsa seluk, nia dehan iha 1992, Konsellu Nasionál Rezisténsia Maubere (CNRM-sigla portugés) hato’o planu dame ba komunidade internasionál.

Hosi planu ne’e, polítika diplomátika iha forun internasionál no husi timoroan sira-nia luta iha rai-li’ur,  solidariedade internasionál sa’e babeibeik ho grupu sira ne’ebé harii iha fatin-fatin, inklui kauza Timor-Leste nian sai koñesidu liután hafoin imájen Masakre Santa Kruz 1991 to’o iha rai-li’ur.

Ho sofrimentu joven loriku aswain sira iha masakre Santa Krúz, Xefe Estadu hato’o lia-fuan espesiál ba foin-sa’e sira tanba ho aten brani no matenek, transfere povu nian-luta ba Indonézia no loke frente ida tan, bainhira sira harii Rezisténsia Nasionál hosi Estudante TL (RENETIL-sigla portugés), ho lideransa husi saudozu Fernando Lasama de Araújo, Frente Klandestina Estudantil TL (FECLETIL-sigla portugés),  no organizasaun sira seluk ne’ebé moris iha Indonézia.

Ho mudansa polítika iha Indonézia, 1999, presaun internasionál aumenta ba kestaun TL, nia hatutan, loke dalan ba referendu nu’udar instrumentu ida hodi hetan solusaun pasífika no salvaguarda interese husi parte hotu.

“Ita konsege referendu 1999 ho esforsu husi ita rasik, timoroan,  no mós komunidade internasionál, iha área diplomátika, liuliu husi saudozu Kofi Annan, Sekretáriu Jerál Nasoens Unidas iha tempu ne’ebá, no husi Portugal, nu’udar poténsia administrante”, relembra.

Nune’e mós ONU liuhosi ninia nia Karta Magna rasik, Lú Olo realsa Timor-Leste, Portugal no Indonézia, halo asaun pasifíka liuhusi akordu  5 maiu 1999, asina iha Nova Iorke, Amérika.

“Ita aproveita loron ohin hodi fó onra boot ba memória Kofi Annan ne’ebé husik hela ita tinan ida ona; ba ita-nia belun di’ak Sérgio Vieira de Mello ne’ebé mate trajikamente iha Bagdad, Irake, tinan 16 ona; ita fó mós omenajen ba ita-nia kompatriota sira, funsionáriu, voluntáriu no kolaboradór internasionál-sira husi ONU, ne’ebé lakon sira-nia moris iha momentu istóriku ida importante tebes ba ita-nia istória”, haktuir iha ninia diskursu perante bainaka sira iha Tasitolu.

Jornalista: Cipriano Colo

Editora: Rita Almeida

HAKEREK NO HATÁN

Please enter your comment!
Please enter your name here