Komunidade João Maia de Jesus . Foto TATOLI: Nelia Fernandes

DILI, 30 agostu 2019 (TATOLI)-Iha komemorasaun tinan 20 Konsulta Populár ne’e, komunidade sira sujere ba governu atu tau-matan ba povu  liuliu povu sira iha área rurál sira hanesan estrada, bee moos, agrikultura no edukasaun.

Komunidade João Maia de Jesus hateten, dezenvolvimentu ba iha povu ne’e iha barak la’o ho di’ak, iha barak mós sei falla. “Kona-ba agrikultura mós hanesan iha foho ne’ebá sei halerik hela, agora ita independénsia ukun aan tinan 20 ona, maibé povu barak sei halerik, balun halerik kona-ba ahi, balun halerik kona-ba dalan, balun halerik kona-ba agrikultura, balun sente (dezenvolvimentu) mas balun la sente,” hateten João Maia de Jesus ba Ajénsia TATOLI, iha Tasi-Tolu, sesta (30/8/2019).

Nia mós akresenta, povu sira iha munisípiu sira, iha área rurál, balun sei halerik, balun sei triste tanba atu lori sira-nia sasán rasik atu ba merkadu arraska tanba estrada, balun atu halai natar arraska tanba bee-dalan atu fornese ba natar arraska.

“Agora ita halo 20 anos ona, ba oin ne’e tenke haree buat sira ne’ebé povu nia halerik, labele promesa de’it maibé haree mós ita-nia ema ki’ikoan sira, tenke halo buat ruma, nune’e povu mós bele sente uitoan,” dehan João Maia de Jesus.

Iha fatin hanesan, Laura Saldanha Gonçalves, komunidade ida mós hateten, agora ita tama ona ba tinan 20 Konsulta Populár, haree ba ita-nia dezenvolvimentu, buat barak la’o ona maibé haree buat barak sei falla.

“Hanesan komunidade hakarak husu ba estadu no governu katak ita-nia nasaun ne’e tama ona tinan 20, oinsá para halo kompleta ita-nia nasaun ne’e bele di’ak, atu hatudu ba mundu atu haree katak Timór ne’e bele duni halo dezenvolvimentu ne’ebé nia vantajen ne’e di’ak liután,” hateten Laura Gonçalves.

Nia mós sujere ba Na’i ulun sira katak atu fó nafatin kolaborasaun no fó liman ba malu. “Atu nune’e iha ita-nia dezenvolvimentu nasaun ne’e nafatin la’o ba oin”.

Enkuantu, Estudante Hermenegildo Gomes hateten, daudaun ne’e ita tama ona ba 20 anos Konsulta Populár nian. “Ita haree daudaun dezenvolvimentu sira, kona-ba infrastrutura nian la’o di’ak ona, kuaze estrada sira la’o di’ak ona”.

Estudante ne’e hateten tan katak iha 20 anos nia laran ne’e, buat ne’ebé ita-nia estadu no governu sira presiza hadi’a mak kualidade edukasaun. “Se ita-nia infraestrutura ne’e di’ak, maibé ita la iha kualidade, aban-bainrua ita hanesan jerasaun foun, atu ka’er ukun oinsá”.

“Tanba ne’e importante edukasaun atu la’o di’ak, atu to’o fali tempu ita ka’er ita-nia nasaun ne’e, ita bele dezenvolve di’ak liután, haree husi ita-nia istória ne’ebé liu ona,” tenik Estudante Hermenegildo Gomes.

Nia reforsa, ita tama ona 20 anos husu nafatin mós ba ita-nia Na’i ulun sira atu ukun ita-nia nasaun ho di’ak, haree ba esperiénsia ne’ebé la’o liu ona presiza hadi’a no esperiénsia sira ne’ebé di’ak dezenvolve liután no buat fraku ne’ebé akontese iha estadu no governu nia laran presiza hadi’a, atu nune’e durante tinan 20 ne’e ita bele moris iha pás, iha armonia nia laran, atu povu sira hotu bele sente katak ita-nia ukun rasik aan, tuir buat ne’ebé ita mehi iha tempu 1975 to’o mai agora.

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here