Ministru Defeza Portugal, João Gomes Cravinho, ohin, hala’o vizita kortezia ba Prezidente Repúblika, Francisco Guterres Lú Olo. Imajen Mídia PR

DILI, 30 agostu 2019 (TATOLI)—Prezidente Repúblika, Francisco Guterres Lú Olo, ohin, iha Palásiu Prezidente Nicolau Lobato, simu vizita kortezia Ministru Defeza Portugal, João Gomes Cravinho, ne’ebé reprezenta Primeiru Ministru Portugal, António Costa, atu partisipa iha Komemorasaun Tinan-20 Loron Konsulta Populár.

Iha enkontru ho Xefe Estadu, João Cravinho hato’o nia haksolok no emosaun bele partisipa iha Komemorasaun Loron Konsulta Populár ne’ebé nia efeitu konsege halibur povu portugés tomak hodi fó solidaridade ba Timor-Leste nia kauza.

Aproveita soru-mutuk ne’e, João Cravinho ko’alia mós kona-ba kooperasaun sira ne’ebé nasaun rua estabelese, liliu iha dezenvolvimentu dalen portugés no kooperasaun sira iha área militár.

João Cravinho hateten Timor-Leste bele konta nafatin ho Portugal nia apoiu iha dezenvolvimentu dalen portugés no kooperasaun sira atu hakbiit FALINTIL-Forsa Defeza Timor-Leste, iha formasaun rekursu umanu no seguransa marítima.

Ba asuntu ne’e, Prezidente Repúblika agradese ba solidaridade no apoiu tomak ne’ebé povu no Governu Portugés fó durante tempu funu to’o ohin-loron, inklui manifestasaun sira ne’ebé halibur povu portugés rihun ba rihun iha luron sira iha Portugal durante fulan-setembru tinan-1999, ne’ebé timoroan sira mós sente no agradese tebe-tebes.

Ko’alia kona-ba dalen portugés, Xefe Estadu hateten portugés hanesan identidade Timor-Leste nian ne’ébé hakbesik Timor-Leste ho Portugal no iha tempu funu, serve mós hanesan símbulu rezisténsia nian.

Xefe Estadu espera kooperasaun sira ne’ebé Governu rua halo bele kontinua no hametin liután relasaun maun-alin Timor-Leste no Portugal.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here