Primeiru-Ministru Austrália, Scott Morrison, hala’o audiénsia ho Prezidente Repúblika, Francisco Guterres Lú Olo. Imajen Mídia PR

DILI, 30 agostu 2019 (TATOLI)—Ohin, Primeiru-Ministru Austrália, Scott Morrison, hala’o audiénsia ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Dili.

Prezidente Repúblika, Francisco Guterres Lú Olo, iha ninian audiénsia ho Primeiru-Ministru Austrália, Scott Morrison, informa katak ho Fronteira Marítima ne’ebé nasaun rua ratifika ona sei marka pájina foun relasaun Timor-Leste (TL) ho Austrália.

Prezidente Repúblika konta tuir kata iha tempu difísil, iha tinan-1999, Austrália lidera International Force for East Timor (INTERFET) ne’ebé Organizasaun Nasaun Unida estabelese atu mantein pás no estabilidade iha nasaun ne’ebé foin hamriik hosi violénsia ne’ebé akontese hafoin referendu.

Tuir Prezidente Repúblika, Governu Austrália kontinua fó nia apoiu ba konsolidasaun estadu Timor-Leste to’o ohin loron. Ho Fronteira Marítima definitiva sei hakle’an liután relasaun entre nasaun rua.

Xefe Estadu informa mós katak sei kontinua tau prioridade ba ema nu’udar sentru ba dezenvolvimentu nasionál liuhusi edukasaun, bee-moos, saúde no ekonomia.

Kona-ba asuntu ne’e, Primeiru Ministru Austrália kontente bele halo vizita dahuluk mai Timor-Leste, hafoin Xefe Governu Austrália anteriór halo nia vizita mai Timor-Leste tinan sanulu liubá.

Scott Morrison hateten katak pájina foun relasaun nasaun-rua sei loke oportunidade no kooperasaun liután iha futuru.

Xefe Governu nia vizita dahuluk mai Timor-Leste atu apriende no rona hanoin sira hosi Timor-Leste kona-ba ninian futuru.

Scott informa katak sei kontinua nafatin konvida Prezidente Repúblika atu bele vizita Austrália nu’udar parte ida atu hametin ba bebeik relasaun entre nasaun-rua.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here