Prezidente Repúblika, Francisco Guterres Lú Olo, iha seremónia ‘banquete’ ofisiál ‘boas vindas’ ho bainaka sira, kinta (29/8) kalan, iha Palásiu Prezidente Nicolau Lobato. Imajen Mídia PR

DILI, 30 agostu 2019 (TATOLI)—Ministru Obra Públika, Basuki Hadimuljono, enviadu espesiál Prezidente Repúblika Indonézia, Joko Widodo, hala’o audiénsia ho Prezidente Repúblika, Francisco Guterres Lú Olo,  iha Palásiu Prezidente Nicolau Lobato, Dili, ohin.

Prezidente Repúblika, Francisco Guterres Lú Olo afirma katak Aniversáriu Konsulta Populár dal-20 ne’ebé selebrada ohin hanesan loron istóriku ida ba Timor-Leste (TL) no Indonézia.

“Referendu ne’e loron importante ida ba Timor-Leste, maibé loron istóriku ba Timor-Leste ho Indonézia tanba iha loron ne’e maka desidi kaer liman haree ba futuru,” hateten Lú Olo.

Iha audiénsia ne’e, Xefe Estadu hato’o nia gratidaun no saudasaun kolorozu ba enviadu espesiál Repúblika Indonézia nian ne’ebé bele hola parte iha komemorasaun aniversáriu referendu Timor-Leste nian ba dala-20.

Enviadu espesiál Indonézia nian iha soru-mutuk ne’e entrega ba Prezidente Repúblika karta husi Prezidente Joko Widodo.

Iha dadalia badak ne’e, Basuki Hadimuljono hato’o kompromisu Indonézia nian atu kontinua hametin kooperasaun no relasaun bilateral entre Indonézia ho Timor-Leste. Enviadu espesiál ne’e subliña liu kompromisu Indonézia nian atu apoiu Timor-Leste iha dezenvolvimentu infraestrutura no rekursu umanu iha Timor-Leste.

Iha biban ne’e, Embaixadór Repúblika Indonézia ba Timor-Leste, Sahat Sitorus ne’ebé akompaña delegasaun Indonézia nian, informa mós ba Prezidente planu Indonézia nian atu instala Garuda Maintenance Facility iha Oé-Cusse, hodi prevee ba manutensaun ba aviaun iha futuru.

Embaixadór Sitorus informa mós planu trilaterál Timor-Leste, Indonézia no Portugal atu harii eskola aviasaun ida iha Oé-Cusse.

Entretantu, Prezidente Repúblika orgullu teb-tebes tanba Timor-Leste ho Indonézia nia kooperasaun la’o di’ak tebes durante ne’e no iha okaziaun ne’e mós, reitera fila-fali kompromisu Timor-Leste nian atu kontinua hametin relasaun bilaterál no amizade entre estadu no povu rua.

Xefe Estadu apresia ba kualidade serbisu ne’ebé empreza públika Indonézia nian halo iha Oé-Cusse no husu atu kontinua mantein kualidade ne’e hodi bele transmiti valór ne’e ba povu Timor-Leste.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here