DILI, 30 agostu 2019 (TATOLI) – Prezidente Asembleia Repúblika Portugál, Eduardo Ferro Rodrigues, iha sesaun solene, ohin iha Parlamentu Nasionál sujere ba Estadu Timor-Leste atu kontinua hametin kooperasaun bilaterál.
“Ida ne’e mak mensajen ne’ebé mak ha’u hakarak husik ho konviksaun, serteza, iha ne’ebé Timor-Leste, no komunidade internasionál iha ezemplu nasaun ida ne’ebé hatene hamrik, hatene moris prósperu no dezenvolve án iha liberdade, pás no demokrásia”, dehan nia iha ninia intervensaun, ohin.
Nia afirma ohin loron Timor-Leste kontinua konsolida ninia independensia no demokrásia maibé sei hasoru dezafiu maka oinsá atu dezenvolve setór edukasaun, ekonómiku, seguransa ai-han sustentável, saúde, problema dezempregu, defeza, kombate alterasaun klimátika no seluktán.
Tanba ne’e, tuir nia Portugál presiza nafatin serbisu hamutuk ho Timor-Leste atu haree ba kestaun hirak ne’e. Nune’e relasaun amizade entre Timor-Leste no Portugál presiza hametin liután.
Jornalista: Nelson de Sousa
Editora: Rita Almeida
