Prezidente Komisaun B Parlamentu Nasionál, Cornelio Gama L7. Imajen/António Goncalves

DILI, 30 agostu 2019 (TATOLI)-Veteranu Cornélio Gama ho kódigu L7 husu ba Governu atu prepara infaestrutura bázika ba sítiu istóriku sira ne’ebé sai hanesan subar-fatin líder nasionál nian.

Tanba tuir L7, subar-fatin líder istóriku sira hanesan Kay Rala Xanana Gusmão, Taur Matan Ruak, no sira seluk ne’e abitante sira seidauk asesu bee, estrada no eletrisidade.

“Ami haree dezenvolvimentu durante tinan 20 la’o di’ak, liuliu estrada, bee-moos no eletrisidade tama hotu ona ba munisipiu sira, maibé fatin seluk seidauk liuliu fatin istóriku sira ne’ebé subar Xanana, Taur Matan Ruak, sira (abitante) sei halerik hela”, afirma Veteranu L7 iha ámbitu komemorasaun aniversáriu 20 Konsulta Populár (1999-2019) no Misaun INTERFET, ne’ebé realiza iha Tasi-tolu, ohin.

Atuál deputadu Bankada PLP ne’e haktuir, bainhira tun bá vizita komunidade sira ne’ebé hela iha fatin sira ne’e hato’o sentimentu triste, tanba fatin ne’ebé sira hela ba nu’udar fatin istóriku maibé sei iha nakukun laran.

Fatin istóriku ne’ebé seidauk asesu ba infraestrutura bázika hanesan iha Fatukona no Raimerei, munisípiu Manatutu, no iha Aikurus munisípiu Aileu, Fatubuiliku no balu iha Alas, munisípiu Manufahi.

Maski nune’e veteranu ne’e dehan, partisipa másima iha prosesu dezenvolvimentu ne’ebé la’o durante ne’e.

Nune’e mós veteranu Adriano aliás Lentil, hatete dezenvolvimentu durante tinan 20 la’o di’ak. “Loron ida ohin loron ida importante no fó hanoin mai ita hotu no halo reflesaun hodi lembra hikas tinan 20 liubá no dezenvolvimentu durante ne’e la’o maski iha konflitu polítiku. Daudaun Governu Daualuk ne’e mós tau ona iha planu atu haree ba estrada rurál”, dehan veteranu Lentil.

Lentil husu ba Governu atu tau prioridade ba estrada rurál nune’e komunidade bele asesu bá merkadu, lori sira-nia produtu ba fa’an nune’e sustenta sira-nia ekonomia família.

Jornalista : Antónia Gusmão
Editora : Maria Auxiliadora

1 KOMENTÁRIU

  1. Hau nia naran: Aderito da Silva agradese ba aman historiku sira atensaun, hanesan Joven ida hakarak mos rekomenda deit katak presiza kria fatin ba fatin Historia sira hodi nene’e bele rai hamutuk dadus luta nian, atu jerasaun foun bele hatene liu tan Historia luta nian bele atrai vizitante ba Iha fatin sira ne’e tantu vizitante lokal no Internasional hodi bele fo venefisiu ba komunidade.

HAKEREK NO HATÁN

Please enter your comment!
Please enter your name here