Primeiru-Ministru Vanuatu, Hon Charlot Salwi, hala’o enkontru ho Xefe Estadu, Francisco Guterres Lú Olo. Imajen Mídia PR

DILI, 30 agostu 2019 (TATOLI)—Sesta ne’e, Primeiru-Ministru Vanuatu, Hon Charlot Salwi, hala’o audiénsia ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pite, Dili.

Durante audiénsia, Prezidente Repúblika, Francisco Guterres Lú Olo agradese solidariedade ne’ebé Governu no povu Vanuatu hatudu durante tempu difísil iha tempu okupasaun Indonézia.

Prezidente Repúblika rekoñese solidariedade rohan-laek ne’ebé Vanuatu fó ba Timor-Leste (TL)  iha tempu okupasaun Indonézia no agradese Primeiru-Ministru anteriór ne’ebé hamriik iha oin hodi defende kauza Timor-Leste atu hetan independénsia iha fórum internasionál sira. Tanba ne’e, Prezidente Repúblika informa katak vitória ne’ebé Timor-Leste hetan nu’udar mós vitória ba Vanuatu.

Ho solidariedade ne’ebé Vanuatu hatudu ba Timor-Leste, Xefe Estadu liuhusi Dekretu Prezidente Repúblika kondekora Governu Repúblika Vanuatu ho Grau Colar da Órdem Timor-Leste ne’ebé sei entrega iha Serimónia Komemorasaun Aniversáriu Referendum ba tinan-20 iha Tasi-Tolu.

Iha biban ne’e, Primeiru-Ministru Vanuatu agradese konvite hosi Estadu Timor-Leste atu bele mai partisipa iha Komemorasaun Aniversáriu Tinan-20 Referendu ho esperansa atu Timor-Leste sei sai prósperu, estável no moris iha pás nia laran.

Primeiru-Ministru agradese apoiu ne’ebé Timor-Leste fó durante siklonu akontese iha 2012 ne’ebé lori dezastre boot ba nasaun. Ho apoiu hosi Timor-Leste no nasaun seluk, liuhusi rekonstrusaun, moris iha Vanuatu fila fali ba normál.

Maski nune’e, Xefe Estadu, Francisco Guterres Lú Olo hateten katak apoiu hosi Timor-Leste ba Vanuatu bainhira hasoru dezastre naturál nia folin la boot liu apoiu ne’ebé Vanuatu fó ba Timor-Leste iha tempu ne’ebé difísil tebe-tebes iha luta hasoru okupasaun Indonézia.

Tanba ne’e, Primeiru Ministru Vanuatu agradese apoiu hosi Governu Timor-Leste relasiona ho esperiénsia manán Fronteira Marítima ho Austrália tanba bele hetan lisaun barak hodi defende kauza hanesan hodi kompleta soberania Vanuatu ninian.

Iha oportunidade ida ne’e, Primeiru-Ministru konvida Xefe Estadu atu bele partisipa iha serimónia komemorasaun tinan-40 independénsia Vanuatu.

Jornalista:  Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here