DILI, 30 agostu 2019 (TATOLI) – Komandu Polísia Nasionál Timor-Leste (PNTL) envolve Konsellu Polisiamentu Komunitáriu (KPK) hodi destaka iha estrada públika kapitál atu reforsa seguransa durante selebrasaun loron konsulta populár no prezensa misaun Forsa Dame iha Timor-Leste (INTERFET-sigla inglés) ba dala 20.
“Alende polísia, ita koloka mós ita nia membru KPK, seguransa sivíl hodi asegura ita nia seguransa la’o di’ak, mezmu ita rona rumoris oin-oin, maibé rumoris sira ne’e la loos, tanba ita nia seguransa la’o di’ak tebes”, katak Komisariu ba jornalista sira iha Kuartél Jerál PNTL, Kaikoli, ohin.
Komisáriu PNTL, Faustino da Costa, hatete involvimentu KPK dadaun ne’e ajuda tebes polísia sira hodi fó seguransa ba povu hodi hetan pás no hakmatek.
Alende, KPK no seguransa sivíl, instituisaun PNTL mós hetan apoiu másimu husi membru FALINTIL-Forsa Defesa Timor-Leste hodi fó seguransa ba eventu istóriku ne’e iha Tasitolu.
Entretantu, tuir observasaun jornalista TATOLI ohin iha kapitál rejista membru KPK uza faru ho lema KPK ne’ebé destakadu iha estrada públika diresaun Tasitolu no Bairru sira seluk iha Dili.
Jornalista: Eugénio Pereira
Editora: Rita Almeida