Primeiru-Ministru (PM) Austrália, Scott John Morrison, hasoru Xefe Negosiadór ba Asuntu Fronteira Maritima, Kay Rala Xanana Gusmão, iha Gabinete FM, Palásiu Governu. Foto/António Gonçalves.

DILI, 30 agostu 2019 (TATOLI)-Primeiru-Ministru (PM) Austrália, Scott John Morrison, agradese Xefe Negosiadór ba Asuntu Fronteira Marítima, Xanana Gusmão, tanba servisu maka’as ba negosiasaun Fronteira Marítima entre Timor-Leste no Austrália.

“Ha’u partikularmente agradese Xanana Gusmão tanba nia servisu durante prosesu negosiasaun”, PM Austrália afirma iha resintu Palásiu Governu, ohin.

Primeiru-Ministru (PM) Austrália, Scott John Morrison, no Xefe Negosiadór ba Asuntu Fronteira Marítima, Xanana Gusmão. Foto/António Gonçalves.

Nia dehan, Austrália no Timor-Leste sai hanesan ezemplu ba mundu tanba bele rezolve disputa fronteira ho relasaun amizade no parseiru di’ak hodi rezolve bazeia ba United Nations Convention on the Law of the Sea (UNCLOS).

Ho nune’e, PM Austrália kompremete sei kontinua apoia Timor-Leste. “Ami kontinua servisu hamutuk ho imi iha área hotu hodi hametin seguransa no estabilidade”.

Governu Timor-Leste no Governu Austrália troka “Nota Diplomátika” kona-ba Ratifikasaun Tratadu Fronteira Marítma iha Tasi Timór, ohin, liuhosi Primeiru-Ministru, Taur Matan Ruak ho Primeiru-Ministru Austrália, Scott John Morrison ne’ebé akompaña husi Ministru Negósiu Estranjeiru Timor-Leste Dionísio Babo Soares no  Ministra Negosiu Estranjeiru Austrália, Marise Payne.

Antes ne’e, tratadu ba Ratifikasaun Fronteira Marítima ne’e asina iha Nova Iorke iha loron 6 marsu 2018. Sasin ba asinatura Fronteira Marítima ne’e husi Sekrétariu Jerál Organizasaun Nasaun Unida (ONU), António Guterres, no Prezidente Komisaun Konsiliasaun Obrigatóriu, Peter Taksoe Jensen, ne’ebé asina direita husi Ministra Negósiu Estranjeiru Austrália, Julie Bishop, no Timor-Leste reprezenta husi Ministru Estadu ba Asuntu Fronteira Marítima, Hermenegildo Augusto Cabral Pererira “Agio Pereira”.

Tratatu Fronteira Maritima ne’e ratifika ona husi Parlamentu Nasionál Timor-Leste no Austrália.

Partisipa serimónia troka nota ne’e mak reperezentante Sekretáriu Jerál ONU no Eis Xefe UNAMET, Ian Martin, Prezidente Parlamentu Timor-Leste, Arão Noé de Jesus Amaral, Prezidente Tribunál Rekursu, Deolindo dos Santos, Premeiru-Ministru Vanuatu, Chalot Salwai, bainaka eminente sira, premiadu Nobel ba Dame, José Ramos Horta, Korpu Diplomátiku, Veteranu, reprezentante sosiedade sivíl, Setór Privadu no konvidadu espesiál balun.

Notísia relevante : Tratadu Entrada Iha Vigór, TL-Austrália Ezemplu Di’ak Ida ba Mundu

Jornalista : Florencio Miranda Ximenes

Editora : Maria Auxiliadora 

HAKEREK NO HATÁN

Please enter your comment!
Please enter your name here