DILI, 30 agostu 2019 (TATOLI)-Vensedora The Voice Portugal, Maria Vitória ka Marvi sei hananu múzika hitu hodi anima populasaun sira, orsida kalan, iha Tasi Tolu hodi komemora tinan 20 Konsulta Populár.
Marvi hateten katak nia preparada hodi anima festa Konsulta Populár 30 agostu ba dala 20 ne’e, iha ne’ebé sei partisipa husi timoroan sira no mós bainaka internasionál sira.
“Múzika ne’ebé mak preparadu ona orsida atu anima iha Tasi Tolu mak liafuan sira ne’e ko’alia kona-ba ita-nia rain mak hamutuk hitu, rua husi Avo Nana,” hateten Artista Marvi ba jornalista Ajénsia TATOLI Salon Titi da Silva, iha Colmera, ohin.
Múzika sira ne’e, tuir Marvi katak sei kanta Marlie, Loro-matan Sa’e, Ha’u-nia Rain Timor, Hamriik Metin, Ha’u-nia Doben, Timor-Leste no Nossa.
Entre múzika hitu ne’e, ninia múzika ida rasik ho títulu Sempre Sai Ha’u-nia Doben ho kompozitór husi nia jestora rasik no rua husi Lider Karismátiku, Kay Rala Xanana Gusmão no haat seluk husi artista no kompozitór seluk. Iha múzika ida ho títulu Rai Timor sei akompaña husi Grupu Dansa Kulturál Santo António.
“Kanta iha oras rua maibé diferensa uitoan; tuku lima hahú kanta múzika rua no tuku sia kanta tan múzika lima hodi anima selebrasaun 30 de agostu ba dala 20,” informa artista timoroan ne’e.
Preparasaun ba múzika sira ne’e, Vensedora The Voice Portugal ne’e haktuir, la to’o fulan maibé semana de’it. Iha biban hanesan, Marvi ko’alia ba Jornalista Ajénsia TATOLI, ohin katak sente nakdedar no ta’uk tanba foin primeravez atu ba kanta iha festa boot Timór nian, hanesan loron Konsulta Populár, iha tinan ida ne’e.
“Primeiru loke abertura múzika ba serimónia ne’e ha’u uza formál no segundu mak uza kultura rua, Indonézia ho Timor; batik kahur ho tais hanesan Manu-fulun, Kaibauk kesi iha ulun signifika hodi identifika kultura rua. Banda Avengers mak orsida akompaña ha’u hodi kanta múzika hirak ne’e iha Tasi tolu atu anima povu Timor-Leste,” nia informa.
Iha biban hanesan, Estrela The Voice Portugal, Maria Vitória ka Marvi ne’e hato’o mós mensajen ba juventude timoroan sira tomak katak loron 30 agostu nu’udar loron ida espesiál no sai mós hanesan loron reflesaun ida hodi hanoin hikas eroi sira ne’ebé luta ba rai ida ne’e atu bele hetan ukun rasik aan.
“Mai ita hamutuk lori 20 anos ne’e ba oin, bele sai Timor ne’ebé furak liu di’ak liu no respeitozu liu iha ema seluk nia matan hodi ema bele hare katak Timór maske ki’ik maibé ita tenke hatudu ita-nia matenek tanba futuru ne’e iha ita joven sira-nia liman, mai ita kaer liman hamutuk hodi la’o ba oin,” sujere Marvi.
Jornalista: Felicidade Ximenes
Editór : Rafy Belo
