Reprezentante Sekretáriu Jéral Nasaun Unida, Ian Martin hato’o diskursu iha Uma Fukun Parlamentu Nasionál. Imajen: TATOLI.

DILI, 30 agostu 2019 (TATOLI)—Durante intervensaun iha sesaun solene plenária Parlamentu Nasionál, ohin, enviadu espesiál Sekretáriu Jerál Nasaun Unida (ONU), Ian Martin hateten Timor-Leste ukun-aan tanba timoroan nia unidade.

Nia haktuir, la’ós United Nations Mission in East Timor (UNAMET) mak lori ukun-aan ba Timor-Leste (TL), maibé ONU mai hatuur no implementa de’it prosesu determinasaun ne’ebé ema barak ona luta hodi hetan iha tempu naruk nia laran.

“Tanba forsa no sofrimentu timoroan hotu, tantu iha rai laran no rai li’ur, sira mak sai luta na’in, eroi, sira mak sai diplomata, sira mak sai klandestina, mak hatutan luta iha órden komandu ida ne’ebé extraordináriu,” nia haktuir.

Ian Martin hateten sira sei labele hakotu misaun ONU se lahó povu Timor-Leste ninia unidade durante prosesu Konsulta Populár.

“Ha’u sente hakmatek tebes atu fila fali mai vizita nasaun ida ne’ebé nakonu ho dame no iha espíritu fraternidade ho nasaun viziñu sira,” Ian Martin haktuir Sekretáriu Jerál ONU nia mensajen.

“Ha’u iha esperansa katak seremónia ne’e sei hamosu liután espíritu foun ba jerasaun foun sira, atu sira kompriende no hala’o iha sira-nia moris, nune’e mós bele sai hanesan forsa bainhira infrenta dezafiu iha futuru,” nia hatutan.

Iha biban ne’e, nia rekoñese katak ekipa Organizasaun Nasaun Unida (ONU) nian mós hanesan eroi ba libertasaun Timor-Leste.

“Buat ne’ebé halo misaun ne’e sai extraordináriu no espesiál mak aproximasaaun másima husi ONU nia ema sira iha TL, liliu sira ne’ebé hela iha sidade no sub-distritu sira. Dalaruma mosu hanesan misaun ida ne’ebé imposível atu organiza Konsulta Populár iha fulan tolu nia laran iha fatin ida ne’ebé difísil—iha ameasa oioin no violénsia nia laran,” Ian Martin informa.

Nia dehan, Sekretáriu Jerál ONU la fó onra no omenájen ida ba ida ba membru ekipa misaun ONU iha Timor-Leste, maibé merese atu fó onra no respeitu ba ema na’in rua mak hanesan Francesc Vendrell, nu’udar reprezentante espesiál ba Timor-Leste, iha tinan 1999, ne’ebé serbisu ho prinsípiu aas ba ukun rasik-aan Timor nian.

Entretantu, eis Xefe UNAMET, Ian Martin, sente onradu no previlejiadu boot tanba bele reprezenta  Sekretáriu Jerál ONU, António Guterres iha Komemorasaun Tinan 20 Konsulta Populár, liuhusi sesaun plenária Parlamentu Nasionál, loron ohin.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here