Vendedór ambulante fa’an sasán iha dalan públiku. Imajen espesiál

DILI, 30 agostu 2019 (TATOLI)-Iha selebrasaun Loron Konsulta Populár ba dala-20 hahú husi kuarta to’o ohin, lori ksolok ba negosiante sira ne’ebé fa’an iha área Tasitolu nian tanba hetan rendimentu di’ak.

Afonso de Andrade, vendedór ambulante hatete retornu ne’ebé hetan di’ak liu kompara ho loron baibain.

“Hau fa’an iha Tasitolu duni, maibé selebrasaun Konsulta Populár tinan ne’e úniku tanba bele atrai ema barak, nune’e ami negosiante sira sente haksolok”, dehan Afonso de Andrade ba jornalista Tatoli, ohin.

Nia kontente tanba fó sorte hanesan ema vendedór. “Hodi bainrua rua to’o ohin, sasán ne’ebé fa’an ne’e ema hola hotu. Loron ida ohin ne’e ami hetan maizumenus dólar 65”.

Bainhira kompara loron baibain, sasán ne’ebé fa’an sorti di’ak loron ida hetan dólar 35, maibé durante selebrasaun ne’e movimentasaun maka’as, komunidade entuziazmu ba loron ne’e.

Ho kontente nia husu ba Governu oinsá atu kria nafatin divertimentu iha loron baibain, la’ós de’it iha selebrasaun Loron Konsulta Populár tinan ne’e.

Iha fatin hanesan, Adelina Soares, nu’udar negosiante kontente ho komemorasaun loron istóriku ne’e tanba povu hotu partisipa ho di’ak tebes.

Vendedora ne’ebé fa’an tinan rua ona iha areadór Tasitolu ne’e hetan retornu ne’ebé bele fó satisfasaun durante selebrasaun Loron Konsulta Populár

“Ha’u kontente tebes nu’udar timoroan no negosiante tanba hetan redimentu dezde ohin dadeer no ha’u hetan ne’e barak, konta dólar 55”, katak negosiante ne’e no osan ne’ebé maka nia hetan ne’e hodi selu nia oan na’in-rua nia eskola.

Nune’e mós negosiante Carlito Martins espresa katak selebrasaun Konsulta Populár tinan ne’e rame tebes, nune’e nia kongratula Xanana Gusmão ne’ebé organiza ho di’ak tebes.

Sobre nia atividade ne’e hetan rendimentu di’ak uitoan kompara ho loron baibain. Entertantu, iha selebrasaun tinan ruanulu ne’e loja no supermerkadu iha Dili laran barak maka taka.

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here