Bandeira FRETILIN.

DILI, 29 agostu 2019 (TATOLI)-Partidu istóriku Frente Revolusionária Timor-Leste Independente (FRETILIN) konsidera loron ohin, 30 agostu, marka pontu importante tebes ida Timor-Leste (TL) nia istória nu’udar povu no nasaun tanba tinan 20 liubá povu Timor-Leste tenke hakat liu luta naruk boot ida.

“FRETILIN nia hakru’uk no laran ksolok ua’in ba povu doben Timor-Leste tomak ba loron ida ohin”, Xefe bankada FRETILIN, Aniceto Guterres, haktuir iha deklarasaun polítika iha sesaun solene ba komemorasaun aniversáriu Konsulta Populár iha Parlamentu Nasionál.

Haree katak luta ba independénsia presiza atu hakuak timoroan sira hotu ne’ebé hakarak ukun rasik-aan, mak fundadór sira harii FRETILIN iha loron 11 fulan-setembru 1974. FRETILIN mak frente ampla ida ne’ebé halibur nasionalista no anti kolonialista hotu-hotu no hakuak povu tomak atu liberta Timor-Leste.

“Luta naruk ne’ebé ita liu no konsege iha tinan 24 nia laran ne’e, misaun ne’ebé ita-nia fundadór sira no ita-nia eroi no martir sira husik hela mai ita atu atinje independénsia totál no kompletu. Luta atu manán ita-nia soberania kompletu”, Aniceto Guterres afirma iha deklarasaun polítika ne’e.

Xefe bankada partidu istóriku ne’e dehan : “Ohin, ita mós sei asiste troka-de-nota entre Timor-Leste ho Austrália atu formaliza ratifikasaun Tratadu Fronteira Marítima entre Timor-Leste ho Austrália. Ita-nia eroi no martir sira liu ema na’in rihun atus rua fó sira-nia aan ba mate atu ita manán independénsia no soberania ne’ebé totál no kompletu”, katak nia.

Nia hatutan, ho sentidu responsabilidade ba misaun sagrada ida ne’e duni, atu hetan soberania kompletu mak bankada parlamentár FRETILIN vota kontra pakote lei sira hotu no rezolusaun kona-ba Tratadu Fronteira Marítima ho Austrália.

“FRETILIN la vota kontra fronteira marítima, maibé vota kontra tratadu ida ne’ebé fó gratis Timor-Leste nia soberania no rikusoin ba rai seluk, buat ida ne’ebé ita-nia eroi no martir sira lakohi to’o fó sira-nia moris rasik, aktu ida ne’ebé FRETILIN hamriik atu kombate no kontra husi primeiro dia kedas”, dehan Aniceto Guterres hodi hakotu deklarasaun polítika ne’e.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here