Komandante Jerál Polísia Nasionál Timor-Leste (PNTL), Komisáriu Polísia Faustino da Costa, kaer liman ho komisáriu Austrália Federal Police (AFP), Andrew Colvin, hafoin remata enkontru iha komandu PNTL, ohin. Imajen Eugénio Pereira

DILI, 30 agostu 2019 (TATOLI) – Komisáriu Polísia Nasionál Timor-Leste (PNTL), Faustino da Costa,  liuhosi enkontru kortejia ho Komisáriu Polísia Federál Austrália (AFP sigla-Inglés), Andrew Colvin, ohin kontinua husu atu fó  apoiu ba PNTL, liliu formasaun rekursu umanu, infraestrutura no ekipamentu servisu.

Durante enkontru iha Kaikoli, Komisáriu PNTL hato’o ninia sentimentu apresiasaun no agradesimentu direta ba ninia amólogu Austrálianu ne’e hodi rekoiñese apoiu barak ne’ebé fó ona ba dezenvolvimentu instituisaun PNTL.

“Komandu PNTL sente priviléjiu boot tanba señor Komisáriu Polísia Federal Austrália, Andrew Colvin, mai hala’o enkontru bilateral, komandu aprezenta kona-ba kooperasaun hotu, ita husu sira kontinua apoiu iha área tolu, dezenvolvimentu rekursu umanu, infraestrutura no ekipamentu seguransa ba polísia”, dehan Komisáriu PNTL  iha Kuartél Jerál.

Komisáriu  Faustino dehan durante tinan barak instituisaun PNTL hetan apoiu maka’as husi Polísia Federál Austrália hodi dezenvolve instituisaun seguransa ne’e.

Enkontru ne’e remata ho entrega prenda hanesan tais  ne’ebé prepara hosi Komandu PNTL.

Entretantu, Komisariu Polísia Federál  Austrália, Andrew Colvin, ohin to’o iha aeroportu Internasionál Prezidente Nicolau Lobato, ho aviaun Royal Australian Air Force, númeru A36002  hamutuk ho Primeiru Ministru Austrália, Scott John Morrison ho  ekipa.

Jornalista: Eugénio Pereira

Editora: Rita Almeida

HAKEREK NO HATÁN

Please enter your comment!
Please enter your name here