Eis Espoza Prezidente Repúblika, Kirsty Sword Gusmão. Imajen Tatoli/Evaristo Soares Martins

DILI, 30 agostu 2019 (TATOLI)—Eis Espoza Prezidente Repúblika, Kirsty Sword Gusmão espera Timor-Leste bele atinje sustentabilidade ekonómiku nune’e la depende de’it ba fundu minarai.

“Ha’u espera nasaun ida ne’e bele atinje sustentabilidade ekonómiku ne’ebé la depende barak liubá mina, la depende barak liubá asisténsia hosi nasaun seluk”, Kirsty ba jornalista sira, hafoin partisipa iha sesaun solene iha Parlamentu Nasionál, sesta ne’e.

Maski atinje sustentabilidade ekonómiku, tuir nia, presiza jestaun di’ak, maibé Kirsty orgullu buat hotu-hotu ne’ebé nasaun ne’e konsege atinje ba povu nia di’ak.

“Maski ita hotu hatene katak dezafiu sei barak teb-tebes iha setór hotu-hotu iha área edukasaun, infraestrutura, feto maluk sira-nia direitu no mós igualdade jéneru, buat barak ita sei presiza halo maibé ita hotu hanoin ne’e tinan 20 ba nasaun ne’e hahú hosi zero”, dehan nia.

Bainhira Kirsty fila hosi Jakarta hamutuk ho eis líder rezisténsia Kay Rala Xanana Gusmão iha setembru 1999, hetan buat hotu-hotu rahun, maibé ida ne’e labele imajina hafoin tinan 20.

Nia hatutan, maski sei iha frakeza barak maibé buat bázika konsege estabelese tiha ona no klaru katak timoroan hotu rekoñese iha apoiu boot hosi nasaun viziñu sira no belun barak iha komunidade internasionál ne’ebé kontribui.

“Maibé ita mós rekoñese katak timoroan sira-nia barani, timoroan sira-nia vontade atu apriende buat foun ne’e mak garante susesu ba nasaun nia dezenvolvimentu to’o agora”, katak nia.

Iha parte seluk, Kirsty hakarak ninia feto maluk sira kaer pozisaun aas iha Governu, iha Parlamentu no mós hetan respeitu hosi sira-nia família hosi sira-nia komunidade hanesan ajente mudansa ba nasaun ida ne’e.

Iha sesaun solene ne’e, Kirsty triste uituan tanba membru Parlamentu feto ida ne’ebé ko’alia reprezenta sira-nia partidu, maibé ne’e hanesan luta naruk, ne’e presiza muda kultura no ne’e la’ós prosesu ne’ebé fásil.

“Ha’u orgullu ho organizasaun feto sira hanesan Fundasaun Alola ne’ebé serbisu maka’as ba igualdade jéneru, ba feto maluk sira-nia saúde no mós feto maluk sira-nia kbiit ekonómiku no polítiku”, hateten Kirsty Sword Gusmão.

“Ha’u fiar katak nasaun ida ne’e sai inspirasaun boot ba mundu tomak no ha’u orgullu tebes tanba ha’u hetan fiar hosi timoroan barak atu bele involve ha’u-nia aan kontribui uituan ba prosesu dezenvolvimentu no luta ba ukun rasik-aan”, nia haklaken.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here