Prezidente Repúblika, Francisco Guterres 'Lú Olo'. Imajen Tatoli/ António Gonçalves

DILI, 30 agostu 2019 (TATOLI)—Prezidente Repúblika, Francisco Guterres Lú Olo, hateten, ba oin, líder nasionál sira tenke tau hanoin ida de’it no hetan konsensu liuhusi kompromisu ida ne´ebé klaru, atu hasoru dezafiu-sira ne’ebé  boot tebes iha oin.

Dezafiu boot sira ne’e, nia esplika, mak hanesan oinsá bele hasa’e reseita doméstika atu estadu labele depende de’it ba minarai no gás, oinsá mak finansiamentu orsamentu estadu ho reseita hosi minarai bele tuun hosi pursentu 80 ba pursentu 60, no tuir kritériu ba rasionalidade despeza hosi rendimentu sustentável estimadu.

Aleinde ne’e, nia salienta, oinsá bele diversifika ekonomia no alkansa kreximentu ida ne’ebé bele sustenta ba tinan naruk ne’ebé mai hosi setór produtivu hanesan agrikultura, peska, turizmu, otelaria, indústria ai-han no bele loke oportunidade empregu barak liután ba foinsa’e sira.

Nune’e mós, oinsá bele halakon ona malnutrisaun ne’ebé sei afeta labarik no inan-sira no oinsá garante feto no mane nia direitu hanesan.

“Iha komunidade internasionál nia oin, ita promete ona bainhira ita adere ba Objetivu Dezenvolvimentu Sustentável, no ita rasik integra tiha ona objetivu hirak ne’e, iha ita-nia Planu Estratéjiku Dezenvolvimentu 2011-2030. Adere ba objetivu-sira ne’e, no integra tiha iha Planu Estratéjiku, la’ós de’it kompromisu mamuk ida, maibé mós obrigasaun Estadu nian atu fó resposta konkretu ba dezafiu oioin iha leten,” Xefe Estadu Lú Olo hato’o kestaun ne’e liuhusi ninia diskursu iha seremónia Komemorasaun Loron Konsulta Populár ba dala 20 iha Tasi Tolu, Dili, sesta kalan ne’e.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here