Grupu Korál Nossa Senhora de Graça. Imajen Tatoli/Hortençio Sanchez

DILI, 30 agostu 2019 (TATOLI)—“Ami grupu foun ne’ebé foin harii iha maiu 2019 tinan ne’e. Ami-nia objetivu la’ós atu kompete maibé atu anima públiku nia matan de’it,” dehan reprezentante Grupu Korál, Jenifer Luisa Alves ba Agência Tatoli iha Tasi Tolu, Dili, ohin.

Grupu Korál Nossa Senhora de Graça antes ne’e lakohi kompete atu buka manán maibé pelu kontráriu grupu ne’e sai vensedór iha Kompetisaun Korál ne’ebé foin lalais hala’o iha Sentru Konvensaun Dili (CCD-sigla Portugés) hodi Komemora Tinan 20 Konsulta Populár.

“Ami hanesan grupu foun ida ne’ebé foin mak harii maioria ho joven de’it ho idade 16-30. Ami hetan primeiru lugár iha Kompetisaun Korál Múzika Rezisténsia ne’e ha’u sente kontente tebes,” dehan Jenifer ho ksolok.

Nia esplika, grupu refere harii ho objetivu atu halibur joven hotu ne’ebé laiha kampu traballu nune’e bele hasa’e joven sira-nia kapasidade no talentu.

Tuir Jenifer katak Korál la’ós fásil maibé bele dehan difísil tanba ema hirak ne’ebé involve-aan iha Korál tenke mentalidade di’ak no tenke hala’o treinamentu ne’ebé másimu.

“Preparasaun ami-nian la’ós foku de’it ba kanta maibé ami uza tékniku barak halai liu-ba tékniku iis. Antes atu kanta, ami treinu sempre hahú ho ezersísiu,” nia tenik.

Nia hatutan, difikuldade ne’ebé grupu ne’e hasoru mak membru barak estudante entaun hala’o treinamentu dalaruma la kompletu maibé sira konsege buka alternativu oioin to’o ikus bele rezolve difikuldade hirak ne’e.

Grupu ne’e mosu seidauk hetan suporta hosi parte ruma, maibé membru hirak involve iha grupu ne’e mak suporta malu de’it. Totál membru iha grupu ne’e hamutuk rua-nulu resin rua—feto sanulu resin ida no mane sanulu resin ida.

Grupu ne’e harii to’o agora foin mak primeiravez partisipa iha eventu refere to’o sai vensedór. “Ami-nia esperansa ba oin, grupu ne’e sei la mate de’it iha ne’e maibé sei kontinua nafatin. Ami mós sei la taka dalan maibé nakloke ba maluk joven sira karik hakarak mai hamutuk ho ami,” Jenifer informa.

Nia hateten katak múzika eskollidu iha kompetisaun ne’e hamutuk sia (9) maibé sira hili rua de’it mak hanesan múzika ‘Tansa La Dame’ no ‘Lemorai’. Múzika rua ne’e mak sira hananu lori sira ba vitória.

Jornalista: Horteçio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here