Sarani Lolotoe halo velada ba Krùs Joven. Imajen/Domingos Piedade Freitas

LOLOTOE, 29 agostu 2019 (TATOLI)– Sarani lubun ne’ebé horik iha Parókia Nossa Señora do Rossario de Fatima Lolotoe, kuarta kalan (28/08/2019), halibur malu iha  Parókia Lolotoe hodi halo velada, reza, hananu, hodi “hawelok no hana’i” Krús  Joven.

Notísia Relevante : Sarani Iliomar Entrega Krús Joven ba Lolotoe

Sarani Lolotoe, Munisípiu Bobonaro, foin lalais ne’e, simu Krús Joven husi Sarani Iliomar, Munisípiu Lautem, hodi lori ba horik ho sira atu afirma fila-fali joven sira nia fiar iha Kristu no iha ai-Krús nu’udar sinál domin no salvasaun.

Bendito do Rego nu’udar Prezidente Konsellu Pastoral Parókia Lolotoe.

Bendito do Rego nu’udar Prezidente Konsellu Pastoral Parókia Lolotoe, hateten, sarani Lolotaoe kontenta no agradese tebes bainhira hetan fiar husi  Prezidente Episkopál Timorense nu’udar mós Bispu Dioseze Maliana, Mgr. Norberto Amaral, ne’ebé pronunsia Krús Joven iha Iliomar lori mai horik ho sarani sira Lolotoe.

Preparasaun simples mak sarani sira kolabora malu hodi simu Krús Joven husi Iliomar mak hanesan, hadi’a estrada husi Bobonaro to’o Lolotoe, hadi’a salaun parokiál, inklui hadi’a dalan sira ba kapela sira ne’ebé pertense ba Parókia Lolotoe.

“Ha’u nu’udar Prezidente Konsellu Pastoral s kontente tebetebes ho prezensa krús joven nian iha ami nia leet tanba durante nee sarani sira balun nunka ba igreja maibé ho prezensa krús joven nian ema barak mak ema oi-oin mak hasae sira nia orasaun iha krús joven nia oin,” hateten Bendito do Rego, ba Ajénsia TATOLI, bainhira remata reza tersu hamutuk ho sarani sira, iha salaun parokiál Lolotoe.

Nia fó sasin katak, antes nee igreja/kapela mós mamuk no la duun iha movimentasaun fiar nian liu husi sasin moris sarani nian, maibé ho prezensa krús joven nian movimentu makaas iha atividade velada no misa loroloron.

Kona ba kontribuisaun no preparasaun hotu, nia informa, kontribuisaun hotu-hotu mai husi sarani rasik, Lolotoe oan sira ne’ebé serve hanesan funsionáriu estadu, veteranu, benefisiáriu martires sira atu realiza prezensa krús nian inklui mós eventu tolu ne’ebé importante tebes mak misa abertura krús joven, inaugurasaun igreja no ordenasaun prezbíteru.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here