Ministru Estadu Presidensia Konsellu Ministru, Agio Pereira ho espoza, simu vizita Prezidente Asembleia Republika Portugál, Eduardo Ferro Rodriques ho espoza to’o aeroportu Komoro Dili, kinta (29/08). Imajen Eugénio Pereira

DILI, 29 agostu 2019 (TATOLI) – Prezidente Repúblika  Portugál, Marcelo Rebelo de Sousa, kongratula povu Timor-Leste ne’ebé komemora tinan 20 loron konsulta populár 30 agostu 1999-30 agostu 2019.

Mensajen ne’e transmite liuhosi Reprezentante Xefe Estadu hanesan mós Prezidente Asembleia Repúblika Portugál, Eduardo Ferro Rodriques,  ba jornalista  sira iha aeroportu Internasionál Prezidente Nicolau Lobato  Komoro Dili, ohin

Reprezentante Xefe Estadu Portugál ne’e dehan Nasaun rua iha ninia istória pasadu ne’ebé furak iha konstestu relijiaun, kulturál, lian, tanba ne’e tenke hametin liután kooperasaun bilaterál iha futuru.

“Mensajen amizade husi nasaun rua ne’ebé la’o ona iha tempu naruk, la’ós de’it husi liafuan maibé mós husi aktu kooperasaun oin-oin tenke nafatin kontinua”, afirma.

Durante estadia iha Dili, tuir planu Portugál sei estabelese tan kooperasaun servisu  ho Governu iha setór edukasaun, defeza  no área perioridade seluk tan.

“Ha’u hanoin tenke haree kondisaun ba dezenvolvimentu ne’ebé di’ak ba Estadu Demokrátiku, investimentu forte iha edukasaun, formasaun no kulturál no kria kondisaun hodi garante dezenvolvimentu sosiu-ekonómiku inkluziva, hanesan área ne’ebé mak iha Portugál mós iha partisipasaun no sei kontinua, hafoin akordu ne’ebé asina ona husi governu sira,” tenik Eduardo.

Eduardo reforsa husi rezultadu kooperasaun ne’ebé la’o ona durante ne’e, sei kontinua hametin relasaun amizade entre Estadu no povu  nasaun rua.

Entretantu, Prezidente Asembleia Portugál, Eduardo ho espoza to’o iha aeroportu Internasionál Komoro, simu diretamente husi Ministru Estadu Presidensia Konsellu Ministru, Agio Pereira no Ministru Negosiu Estranjeru no Kooperasaun, Dionísio da Costa Babo Soares.

Bainaka seluk  maka  to’o iha Timor, iha kinta (29/8),  ho aviaun Citilink maka Vise Ministru Cambodia, Park Sotkhorn, Ministru Defeza Singapura, Maliki Osman, Vise Ministra Negosiu Estranjeru Australía, Marise Payne, Ministru   Informasaun no Komunikasaun reprezenta Primeiru Ministru Vietname,  Nguyen Manh no  Ministru Defeza Portugál, João Gomes Gravinho.

Jornalista: Eugénio Pereira

Editora: Rita Almeida

HAKEREK NO HATÁN

Please enter your comment!
Please enter your name here