Prezidente Konsellu Nasionál Islámiku Timor-Leste, Pasqual Sidik Lemorai. Foto Tatoli.

DILI, 29 agostu 2019 (TATOLI)–Prezidente Konsellu Nasionál Izlámiku Timor-Leste (CONESTIL-Sigla Portugés), Pasqual Sidik Lemorai, husu Governu atu fó prioridade ona ba setór edukasaun, tanba Timor-Leste ukun-aan ona tinan 20 nia laran.

“Ami husu Governu Timor-Leste atu investe no prioritiza setór edukasaun nian atu prepara rekursu umanu hodi kontinua lidera nasaun ne’e iha futuru”, Pasqual Sidik Lemorai ba Ajénsia Tatoli iha Meskita An-Nur, Kampung Alor, ohin.

Líder Izlámiku konsidera Governu fó ona atensaun ba setór edukasaun maibé seidauk másimu, tanba labarik sira iha área rurál barak maka seidauk asesu edukasaun.

Tanba ne’e, nia husu ba Governu atu investe setór edukasaun, liuliu hadi’a kondisaun eskola iha kada nivél suku, postu, munisípiu to’o nasionál, atu jerasaun foun sira bele iha matenek atu dezenvolve rai ne’e.

“Iha fatin balun, Governu presiza duni tau-matan ba ita-nia alin sira ho kondisaun di’ak hanesan meza, kadeira no eskola atu halo mudansa ba ita-nia rai”, katak.

Aléinde ne’e mós Governu halo ona esforsu atu investe setór agrikultura, saúde hodi benefisia povu kbiit la’ek maibé mós tenke kontinua investe edukasaun atubele prodús rekursu umanu ne’ebé kualidade.

“Ita dezenvolve nasaun, presiza sidadaun ne’ebé matenek ka iha kapasidade rekursu umanu, saudavel no iha hahán”, afirma.

Prezidente Komunidade Izlámiku  husu ba líder sira ne’ebé uluk luta ba ukun rasik-aan atu hamutuk hodi hakotu impase polítika iha Timor-Leste atu foku ba dezenvolvimentu nasionál.

“Ita atu selebra loron importante iha 30 agostu, ita-nia lideransa sira ne’ebé uluk hahú funu to’o ita ukun aan  presiza hamutuk ona hodi dezenvolve nasionál”, sujere.

Tuir nia katak só solusaun úniku mak lidér nasionál hamutuk hodi dudu dezenvolvimentu nasionál bá oin hodi kombate kiak no mukit.

“Iha tinan 20 ukun-aan, oportunu ona atu líder sira hodi hamutuk atu dezenvolve rai ida ne’e liuliu fó ezemplu ba jerasaun foun sira atu kontinua lidera nasaun ne’e”, tenik.

Jornalista : Florencio Miranda Ximenes

Editora    : Maria Auxiliadora                                         

HAKEREK NO HATÁN

Please enter your comment!
Please enter your name here